Վրացական GHN լրատվական գործակալության փոխանցմամբ, ընդդիմադիր «Վրացական կուսակցության» առաջնորդներից, նախկին պաշտպանության նախարար Իրակլի Օքրուաշվիլին հերքել է այն տեղեկատվությունը, իբր թե պատրաստվում էր ռուսական տանկերի հետ Ցխինվալով վերադառնալ Վրաստան.
«Ինձ համար շատ դժվար է խոսել: Սրտիցս արյուն է կաթում: Արդեն երկրորդ անգամ է նույն բանը տեղի ունենում, և ինձ խանգարում են վերադառնալ Վրաստան: Առաջին անգամ դա տեղի ունեցավ 2009 թվականի մայիսին, երբ ես գտնվում էի Վրաստանի սահմանի մոտ: Այդ ժամանակ վրացական միացյալ ընդդիմությունը բացասաբար վերաբերվեց իմ վերադարձին:
Իսկ ներկայումս որոշ վրաց ընդդիմադիր գործիչներ անմիջապես հավատացին իշխանությունների կողմից շրջանառության մեջ դրված այն տեղեկատվությանը, իբր թե ես պատրաստվում էի ռուսական տանկերի հետ Ցխինվալից ժամանել Վրաստան ու խռովություն բարձրացնել: Հենց դա էլ պառակտում առաջացրեց ընդդիմության շարքերում: Դրանից հետո ինձ այլ ելք չմնաց:
Այնուամենայնիվ, ես ավարտին կհասցնեմ իմ գործը: Եվ եթե չկարողանամ դա անել, ապա ընդմիշտ հրաժեշտ կտամ քաղաքականությանը: Ես ներողություն եմ խնդրում բոլոր նրանցից, ովքեր կարծում են, որ ես խոցել եմ իրենց սիրտը: Սակայն ոչինչ ավարտված չէ, ամեն ինչ առջևում է»:
Հիշեցնենք, որ երեկ վրացական ընդդիմության առաջնորդներից Նինո Բուրջանաձեն Վրաստան գալուց հրաժարվելու համար Օքրուաշվիլիին մեղադրել է անհամարձակության մեջ: