Մեզանում արմատացած սովորույթ է՝ բացի վիրահատության համար սահմանված գումարը, բժիշկներին վճարել նաև հավելյալ գումարներ՝ իրենց գործը լավ կատարելու համար: Սրա հետևանքով շատ հիվանդներ, ովքեր շտապ բժշկական օգնության կարիք ունեն, ստիպված կամ պարտքով գումարներ են վերցնում, կամ դառնում հիվանդության զոհը: «Առաջին լրատվական»-ի հետ զրույցում նման կարծիք հայտնեց «Իրազեկ և պաշտպանված սպառող» ՀԿ-ի նախագահ Բաբկեն Պիպոյանը։
Նա հավաստիացրեց, որ բժշկական ոլորտում չկա մի տիրույթ, որտեղ բացի պետական ծախսերից, բժիշկներին հիվանդի հարազատները հավելյալ գումարներ չտան՝ նշելով, որ վիճակը մի փոքր համակարգված է պոլիկլինիկաներում, որտեղ կան մի քանի բժիշկներ, ովքեր իրենց խղճի առաջ պատասխանատու են և երկար տարիների փորձ ունեն, ուստի գումարներ չեն վերցնում: Սա, ըստ նրա, պայմանավորված է նաև նրանով, որ պոլիկլինիկաները գտնվում են պետության ենթակայության տակ և գումարներ են ստանում, սակայն եթե այստեղ էլ մի փոքր ուսումնասիրություն կատարվի, ապա բազմաթիվ խախտումներ կգտնվեն: Ինչ վերաբերում է մասնավոր հիվանդանոցներին, ապա Բ. Պիպոյանն ասաց, որ այստեղ գործում է այն համակարգը, ինչ բիզնեսում. «Կախված վիրահատության գնից և բարդությունից՝ բժշկին միշտ ավել գումար են տալիս, բայց հավելյալ գումարի միջինացված ինդեքսը գրեթե նույնն է»:
Նա նաև ասաց, որ այս ոլորտում խնդիրը համակարգային է, գոյություն չունի պետական լուրջ վերահսկողություն, «պետության միջամտություն» ասվածը բառեր են, առարկայական չի երևում. «Երբ սպառողը բողոքում է, այդ բողոքը չի ունենում հետևողական շարունակություն, դրա համար էլ մենք դոփում ենք տեղում»:
Բ. Պիպոյանը վերջում հավելեց, որ այժմ ՀԿ-ն այս ոլորտում ուսումնասիրություններ է կատարում, թե ստվերում որքան գումարներ են աշխատում բժիշկները՝ օգտվելով հիվանդների անելանելի վիճակից:
