Այսօր Ճապոնիայի Հիրոսիմա քաղաքում մեկնարկեց միջուկային զենքի չտարածման հիմնախնդրին նվիրված Խաղաղության նոբելյան մրցանակի դափնեկիրների հանդիպումը: Այն ընթանում Է «Հիրոսիմայի ժառանգությունն առանց միջուկային զենքի աշխարհն է» նշանաբանով:
Հրավիրվածների թվում են Խորհրդային միության նախկին նախագահ Միխայիլ Գորբաչովը, Դալայ Լաման, Ամերիկայի Միացյալ Նահանգների նախագահ Բարաք Օբաման, Լեհաստանի, Հարավ-Աֆրիկյան Հանրապետության, Կոստա Ռիկայի նախկին նախագահներ Լեխ Վալենսան, Ֆրեդերիկ դե Կլերկը, Օսկար Սանչեսը, Արևելյան Թիմորի նախագահ Ժոզե Ռեմուզ-Օրտեն։
Գորբաչովը, Վալենսան, դե Կլերկը, Սանչեսը, Ռեմուզ-Օրտեն նամակով դիմել են Նոբելյան մրցանակի 2009թ. դափնեկիր Օբամային` հորդորելով նրան անպայման գալ Հիրոսիմա, սակայն Օբաման չի ընդունել հրավերը, քանի որ այս օրերին մասնակցում է Մեծ քսանյակի գագաթնաժողովին։ Դա մեծ ափսոսանքով են ընդունել հավաքի կազմակերպիչները, քանզի հուսով էին, որ Օբաման հենց Հիրոսիմայում կխոսի իր նախընտրական առանցքային խոստումներից մեկի` միջուկային զենքը ամբողջ աշխարհում վերացնելու նպատակի մասին։ Նախօրեին հայտնի դարձավ, որ հավաքին չի մասնակցի նաև Գորբաչովը։ Associated Press լրատվական գործակալության փոխանցմամբ` բժիշկները նրան արգելել են մեկնել Հիրոսիմա առողջական խնդիրների պատճառով։
Հիշեցնենք, որ այս տարի լրացավ Ճապոնիայի Հոնսյու գլխավոր կղզու հարավ-արևմուտքի այս քաղաքի ամերիկյան ատոմային ռմբակոծման 65 տարին:
Խաղաղության նոբելյան մրցանակի դափնեկիրների այս հանդիպումը կտևի մինչև նոյեմբերի 14-ը: Սպասվում Է, որ նրանք, մասնավորապես, կարծիքներ կփոխանակեն ԿԺԴՀ-ի և Իրանի միջուկային ծրագրերի շուրջ: