Իրավապաշտպան Արտակ Զեյնալյանը հայց է ներկայացրել վարչական դատարան` ընդդեմ պաշտպանության նախարարության: Բանն այն է, որ պաշտպանության նախարարը հրաժարվել է Հելսինկյան քաղաքացիական ասամբլեայի Վանաձորի գրասենյակին տրամադրել 2009 թվականին բանակում զոհված ժամկետային և պայմանագրային զինծառայողների թվի վերաբերյալ տեղեկատվություն, և Զեյնալյանը Հելսինկյան քաղաքացիական ասամբլեայի Վանաձորի գրասենյակի կողմից հայց է ներկայացրել: «Պաշտպանության նախարարը հրաժարվել է տրամադրել հայցվող տեղեկատվությունը այն պատճառաբանությամբ, թե դա գաղտնի է և սահմանված է ցանկով` պաշտպանության նախարարի հրամանով: Այնուհետև մենք դիմեցինք պաշտպանության նախարարին՝ խնդրելով տրամադրել այդ հրամանը, ուր գրված է, թե նշված տեղեկությունը գաղտնի է», – ասել է Զեյնալյանը` հավելելով, որ այս անգամ էլ պաշտպանության նախարարությունից պատասխանել էին՝ հրամանը, որը սահմանում է, թե նշված տեղեկությունը գաղտնի է, նույնպես գաղտնի է: Ի դեպ, Զեյնալյանն այս տեղեկություններն ուզում է` հղում անելով ՀՀ Սահմանադրության 27-րդ հոդվածին և ՀՀ Տեղեկատվության ազատության մասին օրենքին:
Արտակ Զեյնալյանը տեղեկացրեց, որ դատաքննությունն արդեն ավարտվել է և դատավորը մտել է խորհրդակցական սենյակ: Նոյեմբերի 23-ին կընթերցվի որոշումը:
