Վերջին շրջանին հայաստանյան լրատվամիջոցները անդրադարձան Ֆրանսիայի Հայոց Թեմի Նիսի եկեղեցական համայնքում տեղի ունեցած իրադարձություններին: Որոշ հրապարակումներում, սակայն, ակնհայտորեն փորձ էր արվում հասարակոությանը ապատեղեկացնել և Նիսի համայնքում տիրող իրավիճակը արհեստականորեն ներկայացնել օրհասական և մտահոգիչ:
Մասնավորաբար`«Nouvelles d`Arménie» պարբերականի armenews.com կայքում հրապարակված Նիցայի նախկին ծխական խորհրդի հայտարարությունը, որը թարգմանաբար ներկայացված է նաև news.am հայաստանյան կայքում`«Վիթխարի սկանդալ Հայ Առաքելական Եկեղեցու Ֆրանսիայի Հայոց Թեմում» խորագրով, բացարձակապես չի համապատասխանում իրականությանը: Հայտարարության մեջ փորձ է արվում Ֆրանսիայի Հայոց Թեմը ներկայացնել «ճգնաժամային և տագնապահարույց» իրավիճակում:
Այսու հաստատում ենք, որ Ֆրանսիայի Հայոց Թեմը բացարձակապես ճգնաժամային և տագնապահարույց իրավիճակում չէ: Թեմը բնականոն և խաղաղ պայմաններում շարունակում է իր հոգևոր, մշակութային և ազգային արժեքների պահպանման առաքելությունը ֆրանսահայության կյանքում` հակառակ որոշ ուժերի և անձերի հարուցած խոչընդոտների, որոնք Թեմի հաստատման առաջին իսկ օրերից շարունակում են ապակայունացնել ֆրանսահայության թեմական դրությունը:
Հորդորում ենք Նիսի եկեղեցական նախկին վարչության անդամներին դադարեցնել իրենց ավերիչ գործունեությունը և հայ հանրությանը ապատեղեկացնելու փոխարեն` նպաստել Նիսի հայ հավատացյալների հավաքական կյանքում հոգևոր առողջ մթնոլորտի ձևավորմանը: