Վրաստանի նախագահի՝ ազգային փոքրամասնություների հարցերով խորհրդական Վան Բայբուրդը իր անհամաձայնությունն է արտահայտում Միջազգային ճգնաժամային խմբի երեկ հրապարակած զեկույցին և պնդում, որ Վրաստանում հայերը իրենց զգում են պետության լիարժեք քաղաքացիներ։
Հիշեցնենք, որ երեկ միջէթնիկ կոնֆլիկտների ուսումնասիրությամբ զբաղվող Միջազգային ճգնաժամային խումբը զեկույց է հրապարակել Ջավախքի վերաբերյալ, որտեղ փորձագետները նշում են, որ հայերը մի շարք խնդիրներ ունեն Վրաստանում։
ՄՃԽ-ն իր զեկույցում խորհորդ է տալիս Վրաստանի կառավարությանը ճկուն լեզվական քաղաքականություն վարել, իր քաղաքականության վերաբերյալ հայերենով լիարժեք տեղեկատվություն տրամադրել տեղի բնակչությանը, ինչպես նաև խթանել Ջավախքի ինտեգրման, լեզվի և մարդու իրավունքների վերաբերյալ քննարկումները։
«Ես չգիտեմ՝ այդ կազմակերպությունը ինչի հիման վրա է այդպիսի զեկույց հրապարակել, սակայն Ջավախքում հայերը ունեն արտոնություններ, որոնք չունեն որևէ այլ երկրի հայկական համայնքները։ Գործում է ավելի քան 100 դպրոց։ Ի՞նչ ճնշման մասին է խոսքը։ Վրաստանի նախագահի նախագծի համաձայն, հայկական դպրոցների 200 շրջանավարտներ իրավունք ունեն ընդունվել վրացական առաջատար համալսարանները՝ առանց քննություն հանձնելու և պետական ֆինանսավորմամբ»,- ասում է Բայբուրդը մատնանշելու համար վրացական հանդուրժողական վերաբերմունքը։
Բայբուրդը շեշտում է նաև, որ Ջավախքում տեղական կառավարումը իրականացնում են հայերը։ «Սա ևս ապացուցում է, որ վրացական կառավարությունը հանդուրժող է հայերի հանդեպ»,- ասում է Բայբուրդը։