Երևանի գլխավոր ճարտարապետի պաշտոնում Նարեկ Սարգսյանի նշանակումը բավական մեծ աղմուկ է առաջացրել հասարակության ակտիվ շրջանում, հատկապես սոցիալական ցանցերում: Նարեկ Սարգսյանն այն ճարտարապետն է, որի պաշտոնավարման մոտ հինգ տարիների ընթացքում Երևանը բետոնապատվեց Գինեսի ռեկորդների գրքում ներկայացված լինելու արագությամբ և ծավալով:
Ինչ խոսք, նրա պաշտոնավարումից հետո էլ Երևանն առանձնապես աչքի չի ընկել կանաչապատ տարածքների հանդեպ քաղաքային իշխանության ուշադրությամբ, բայց Սարգսյանի վերադարձը Երևանի գլխավոր ճարտարապետի պաշտոն, վկայում է «բետոնե դարի» վերադարձի մասին, կամ «բետոնե դար» մեր վերադարձի մասին: Ընդ որում, խոսքն այստեղ չի սահմանափակվում միայն Երևանի քաղաքաշինական խնդիրների և շրջակա միջավայրի պահպանության համադրության շրջանակներում: Խոսքն ընդհանրապես դուրս է նաև Երևանի շրջանակից:
Խոսքն այստեղ հասարակական-քաղաքական շրջանակի մեջ է, և իշխանությունն այս նոր նշանակումով պարզապես ցույց է տալիս, որ իրականում, իրական կառավարման ռեժիմում, քարոզչական հոլովակներից և հնարքներից դուրս, ինքը թքած ունի հասարակական կարծիքի վրա, որ քաղաքի կառավարման գործում հասարակության կարծիքը իրենց համար որևէ նշանակություն չունի և գերական կորպորատիվ իշխանական շահերն են: Կասկած չկա, որ այն, ինչ իր պաշտոնավարման տարիներին արել է Երևանի հետ Նարեկ Սարգսյանը, միայն նրա պատասխանատվության ներքո չէ: Ի վերջո որևէ մեկը չի առարկի, որ նա ընդամենը կատարել է ավելի վերևից, իսկ ավելի կոնկրետ՝ նախագահի նստավայրից եկած ցուցումները, այսինքն արել է այն, ինչ կարգադրել է Ռոբերտ Քոչարյանը: Բայց Նարեկ Սարգսյանը երբևէ չի էլ փորձել ընդդիմանալ այդ ամենին, ընդդիմանալ Երևանի դեմքի և նույնիսկ ոգու աղավաղմանը: Մինչդեռ, այն ոլորտը, որում աշխատում է Նարեկ Սարգսյանը, ստեղծագործական, մտավոր ոլորտ է, և եթե այդ ոլորտի մարդն է աչքի ընկնում սովորական չինովնիկական կոմֆորմիզմով, ապա դա այլ ոլորտների պաշտոնյաների համեմատ կրկնակի դատապարտելի և քննադատելի, ու կրկնակի վտանգավոր երևույթ է: Հետևաբար, այդ կարգի պաշտոնյային վերադարձնել Երևանի գլխավոր ճարտարապետի պաշտոնին, նշանակում է հստակ մեսիջ հղել հասարակությանը, որ Երևանը երևանցիներին չի վերադարձվի երբեք: Նոր քաղաքապետ, թեև արդեն համեմատաբար նոր քաղաքապետ Կարեն Կարապետյանը կարող է անել հազար գործ, հազար կարգին որոշում կայացնել, հազար լավ նախաձեռնություններով հանդես գալ, սակայն ցանկացած կառավարման ընթացքում լինում են հիմնաքարային որոշումներ, որոնք ի զորու են սևացնելու ամենափայլուն աշխատանքն ու ծրագիրն անգամ, ու թող չափազանցություն չթվա, սակայն Նարեկ Սարգսյանին Երևանի գլխավոր ճարտարապետ վերանշանակելը հենց այդ գործերից է:
Այնպես որ իսկապես ժամանակն է նախընտրական դիմակները հանել, առավել ևս, որ դրանք պատռվում են հերթով, ու Կարեն Կարապետյանին վերանշանակել Հայռուսգազարդում, իսկ Գագիկ Բեգլարյանին էլ Երևանի քաղաքապետարանում: