Ադրբեջանական Vesti.az կայքի փոխանցմամբ, ադրբեջանցի քաղաքագետ Վաֆա Գուլուզադեն անդրադարձել է ղարաբաղյան հակամարտության կարգավորմանը.
«Ղարաբաղյան հակամարտությունը կկարգավորվի միայն այն ժամանակ, երբ նավթի գները կտրուկ անկում կապրեն: Իսկ դրանք անպայմանորեն անկում են ապրելու: Եվ այդ ժամանակ էլ Ռուսաստանը զբաղված կլինի դրանով և չի կարողանա ուշադրություն հատկացնել Ղարաբաղին, Աբխազիային, Հարավային Օսիային և անգամ Չեչնիային:
Ռուսաստանում կարծում են, թե նավթի ներկայիս գնաճը հավերժ է: Դրա համար էլ Ռուսաստանը որևէ բարեփոխում չի իրականացնում: Նավթի գների աճը բթացրել է Ռուսաստանի զգոնությունը:
Նավթի գների անգամ փոքր անկման դեպքում Ռուսաստանը կզրկվի գումարից։ Այն չի բավականացնի տարրական սննդամթերք գնելու համար:
Եթե Ռուսաստանը դադարի միջամտել ղարաբաղյան հակամարտությանը, ապա Արևմուտքը կլուծի այդ խնդիրը: ԱՄՆ-ը մեծ ազդեցություն ունի Հայաստանի և անգամ Ղարաբաղում բնակվող հայերի վրա: Սակայն Հայաստանը դեռ «գտնվում» է Ռուսաստանի կազմում»:
Հիշեցնենք, որ օրեր առաջ բրիտանական The Economist պարբերականն Ադրբեջանին նվիրված հոդվածում գրել էր. «Նավթային եկամուտները կազմում են Ադրբեջանի ՀՆԱ-ի 55 տոկոսը, սակայն դա չի կարող հավերժ տևել: Նավթի արտադրությունն Ադրբեջանում հասել է առավելագույն մակարդակի: Որոշ գնահատականներով, Ադրբեջանի նավթային պաշարները սպառվելու են 2028 թվականին:
Ոչ նավթային հատվածը ավելի քիչ ուշադրություն է պահանջում: Կառավարությունը պետք է ջանքեր գործադրի` պահպանելու այն առատաձեռնությունը, որին սովոր է ադրբեջանական հասարակությունը»: