«Նաիրիտ» գործարանի շուրջ 200 աշխատակիցներ այսօր բողոքի ակցիա անցկացրին ՀՀ նախագահի նստավայրի և ԱԺ շենքի առջև` պահանջելով վճարել իրենց 4 ամսվա աշխատավարձերը և վերաշահագործել գործարանը: «Մենք շարունակելու ենք բողոքել՝ մինչև չբարձրացնեն աշխատավարձերը, չվերագործվի գործարանը, մեր 4 ամսվա աշխատավարձերն ամբողջությամբ չվճարվեն: Էդ որ գնում են էդպես մուրում են, թող բերեն մեզ էլ տան»,-ասաց աշխատակիցներից մեկը: Գործարանի աշխատակիցների հետ հանդիպեց Սերժ Սարգսյանի աշխատակազմի ղեկավար Կարեն Կարապետյանը. «Կա հանրապետության նախագահի հստակ հանձնարարականը մոտ օրերս գոնե աշխատավարձի մի մասը` մեկ ամսվանը, վճարել և մեկ ամսվա ընթացքում գտնել նոր ռեսուրսներ հարցին ամբողջական լուծում տալու համար»,- ասաց նա` հավելելով, որ գերխնդիր է մնում «Նաիրիտ»-ի վերաշահագործման հարցը:
Բնականաբար, Կարեն Կարապետյանը հընթացս վիրավորեց «Նաիրիտ»-ի աշխատակիցներից մեկին: Քաղաքացու վրդովված բացականչությանը, թե «փող եք ուտում», Կարապետյանը արձագանքեց. «Ես փող չեմ ուտում, բերում եմ քո նման համբալներին եմ կերակրում»:
