Ինչպես հաղորդում է Mashable կայքը, Լեդի Գագայի վերջին ալբոմը` Born This Way-ը, որը մինչև թողարկվելն արդեն հասցրել է մեծ աղմուկ հանել, վաճառվում է Amazon.com կայքում ընդամենը 0.99 դոլարով: Կայքը հայտնում է, որ Amazon.com-ում նախկինում էլ էժան առաջարկներ հնարավոր էր գտնել, սակայն այս քայլն աննախադեպ է, հատկապես այն պարագայում, որ Լեդի Գագայի այս ալբոմի նկատմամբ հետաքրքրությունն անչափ մեծ է եղել:
Բոլոր նրանք, ովքեր Amazon.com կայքում կգնեն Լեդի Գագայի վերջին ալբոմը, հնարավորություն կստանան կայքի Cloud Drive ծառայությունում բացել 20 ԳԲ հիշողությամբ հաշիվ, որտեղ կարող են վերբեռնել իրենց սիրած երաժշտությունը և լսել աշխարհի ցանկացած վայրում:
Հիշեցնենք նաև, որ անցած շաբաթ ինտերնետում հայտնվել էին կայքեր, որոնք առաջարկում էին անվճար ներբեռնել Born This Way ալբոմը, որը թեպետ դեռ պաշտոնապես չէր թողարկվել:
