Вконтакте սոցիալական ցանցի ղեկավարներից մեկը՝ Միխայիլ Միրիլաշվիլին Фонтанка.ру կայքին տված հարցազրուցի ժամանակ ասել է, որ Facebook սոցցանցը Ռուսաստանում հեռանկար չունի, քանի որ այնտեղ արդեն կա Вконтакте-ն: «Facebook-ը միայն մի քանի երկրներում հեռանկար չունի: Չինաստանում՝ հայտնի պատճառներով, և Ռուսաստանում, քանի որ այստեղ արդեն գոյություն ունի Вконтакте-ն»,- նշել է նա:
Նա պատմել է, որ նախագիծը ստեղծել են իր որդին՝ Վյաչեսլավը, Պավել Դուրովը և Լև Լևիևը: Միրիլաշվիլին որդուն բազմիցս իր օգնությունն է առաջարկել, մասնավորապես գովազդի հարցում: «Որդիս ասաց, որ մենք ուրիշ ճանապարհով կգնանք, և մեզ գումար պետք չէ գովազդի համար: Այդ իսկ պատճառով իմ մասնակցությունը այս նախագծին կարելի է համարել զրոյական: Ես շատ ուրախ եմ, որ երիտասարդ սերունդն այսպիսին է»,- ավելացրել է նա:
Финанс ամսագիրը սոցցանցում Վյաչեսլավ Միրիլաշվիլիի մասնաբաժինը գնահատում է 24 մլրդ ռուբլի (մոտ 0.8 մլրդ դոլար): Գործարարն ասել է, որ Вконтакте-ն դեռ շատ աճելու տեղ ունի և նույնիսկ այն հսկայական ձեռքբերումները, որ կան, դա նվազագույնն է, ինչ հնարավոր է անել: «Ես միայն հանդես եմ գալիս իբրև ներդրող, որը տարբեր ներդրումներ է անում համացանցի տարբեր ոլորտներում, և ոչ ավելին»,- ասել է նա:
