Ըստ Anadolu լրատվական գործակալության` Թուրքիայի խորհրդարանի բյուջետային պլանավորման հանձնաժողովը հաստատել է արտգործնախարարության 2011 թ. բյուջեն: Այն կազմում է 1 մլրդ 171 մլն 14 հազար 700 թուրքական լիրա (1 դոլարի արժեքը կազմում է 1.52 թուրքական լիրա):
Խորհրդարանական հարցուպատասխանին ներկա է գտնվել նաև ԱԳ նախարար Դավութօղլուն: Իր ելույթի ժամանակ վերջինս անդրադարձել է նաև հայ-թուրքական թեմային: Դավութօղլուն արձագանքել է թուրքական ընդդիմության այն պնդումներին, թե Օբաման եկավ Թուրքիա, պահանջեց, որ Անկարան կարգավորման գործընթաց սկսի, դրա համար էլ մեկնարկեց հայ-թուրքական կարգավորման գործընթացը: «Դա վայել չէ հանրապետական Թուրքիայի և ոչ մի կառավարության: Երբ հայկական ու կիպրական հարցերի շուրջ զարգացումներ էին ընթանում, Օբաման այն ժամանակ դեռ սենատոր չէր: Դրանում վստահ եղեք: Թուրքիայի Հանրապետության իշխանությունները ոչ մի տեղից հրահանգ չեն ստացել»,- ասել է Թուրքիայի ԱԳ նախարարը: