Օրերս Երևանի քաղաքապետարանի հետ համագործակցության շրջանակում Երևանի քաղաքապետ Կարեն Կարապետյանը հանդիպել էր «ԱՌԴԱ» բարեգործական հիմնադրամի ներկայացուցիչների հետ, որոնց կողմից Երևանում և հանրապետության մարզերում իրականացվում են մանկապարտեզների հովանավորման, կարիքավոր ընտանիքների աջակցման, բժշկական և մի շարք այլ ծրագրեր: Քանաքեռ-Զեյթուն վարչական շրջանում Կարեն Կարապետյանը նախ այցելել է թիվ 154 մանկապարտեզ, որը հիմնադրամի միջոցներով հիմնանորոգվել ու կահավորվել է նոր գույքով և մանկական խաղերով: «ԱՌԴԱ»-ն մանկապարտեզի հովանավորությունը ստանձնել է 50 տարի ժամկետով:
«Շրջելով միջանցքներում ու խմբերում համոզվեցի, որ շատ հոգատար ու կոկիկ աշխատանքներ են իրականացվել: Սա մեր մանկապարտեզներին այլընտրանքային աջակցության դասական օրինակ է,- նշել է Կարեն Կարապետյանը:
Երևանի քաղաքապետը ծանոթացել է նաև հիմնադրամի կողմից մանկապարտեզին հարակից տարածքում կառուցված արհեստագործական ուսումնարանի պայմաններին: Ուսումնարանի դասասենյակները համալրվել են նորագույն տեխնիկական միջոցներով, ինչն ուսումնառության համար կապահովի ավելի նպաստավոր պայմաններ: Ուսումնարանն արդեն համագործակցում է Երևանի արդյունաբերական քոլեջի հետ: Առայժմ գործում են միայն օտար լեզուների և համակարգչային դասընթացների խմբերը: Առաջիկայում ուցուցանվող մասնագիտությունների թիվը զգալիորեն կմեծանա:
Կրթօջախի բակում Կարեն Կարապետյանը խորհրդանշական եղևնի է տնկել:
«ԱՌԴԱ» բարեգործական հիմնադրամի կողմից իրականացվող բժշկական ծրագրի ընթացքին Կարեն Կարապետյանը հետևել է Նոր Նորք վարչական շրջանի «Սուրբ Գրիգոր Լուսավորիչ» բժշկական կենտրոնում, որի հետ «ԱՌԴԱ»-ն համագործակցում է շուրջ 10 տարի: Այժմ էլ հիմնադրամի ֆինանսավորմամբ մեկնարկել է դիմածնոտային արատների վերականգնման և վիրահատության կարիք ունեցող հանրապետության բոլոր մարզերի երեխաների անվճար վիրահատության ծրագիրը, որում ընդգրկվել են հանրապետության բոլոր մարզերի, ինչպես նաև մանկատների ու սոցիալապես ծանր պայմաններում ապրող ընտանիքների երեխաները:
Ծրագիրն իրականացվում է բժշկական կենտրոնի ու ԱՄՆ ից հատուկ այս նպատակով ժամանած 15 պլաստիկ վիրաբույժների համատեղ ջանքերով: Առաջին փուլում կվիրահատվի 120 երեխա, նույնքան երեխայի վիրահատություն էլ կկազմակերպվի ծրագրի հաջորդ փուլում: Շրջելով հիվանդասենյակներում, Երևանի քաղաքապետը ընդգծել է, որ հատկապես առողջապահական բնագավառում նման կամավոր ներդրումներն իսկապես խրախուսելի են ու անհրաժեշտ:
