Ինչպես տեղեկացնում է Грузия Online-ը, ՄԱԿ-ում Վրաստանի նախկին դեսպան, «Մեր Վրաստանը- Ազատ դեմոկրատներ» ընդդիմադիր կուսակցության առաջնորդ Իրակլի Ալասանիան կարծիք է հայտնել, որ Թեհրանի հետ Թբիլիսիի հարաբերությունների խորացումը ժամանակավրեպ է, քանի որ այժմ աշխարհը խոսում է Իրանի միջուկային ծրագրի կապակցությամբ պատժամիջոցների խստացման մասին: «Այն ժամանակ, երբ աշխարհը խոսում Է պատժամիջոցների խստացման մասին, երբ խոսքը վերաբերում է միջուկային հավակնություններին, որոնք պետք է սահմանափակվեն, և նույն ժամանակ Վրաստանի կողմից նման քայլ է արվում… դա ճիշտ ընտրված ժամանակ չէ: Կարծում եմ, որ դա միջազգային հանրության ուշադրությունը գրավելու՝ Սաակաշվիլիի ևս մեկ փորձն է»,- նշել է Ալասանիան: Ավելի վաղ Վրաստանի նախագահ Միխեիլ Սաակաշվիլին պաշտպանել է Վրաստանի և Իրանի միջև երկխոսության ու պաշտոնական շփումների խորացումը:
Հիշեցնենք, որ Սաակաշվիլին այդ մասին հայտարարել է Իրանի ԱԳ նախարար Մանուչեհր Մոթթաքիի հետ վերջերս Բաթումում կայացած հանդիպմանը, որի ժամանակ կողմերը քննարկել են երկկողմ հարաբերությունները և միջազգային հարցեր: Նախագահ Սաակաշվիլին նշել Է Իրանի կառավարության կողմից Վրաստանի տարածքային ամբողջականության և ինքնիշխանության պաշտպանության կարևորությունը:
