«Սիրիան այն երկրներից է, որի շուրջ ոչ միայն տեղեկատվությունն է շատ, այլ նաև՝ ապատեղեկատվությունը: Ամենակարևոր երկու թեմա կա Սիրիայի հետ կապված` նախագահ Բաշար Ալ-Ասադի վրա մահափորձը և սիրիական իսլամականների և քրդերի միջև լարված իրավիճակը: Սրանք համաշխարհային մամուլի կիզակետում են»,- լրագրողներին տեղեկացրեց արևելագետ Սուրեն Մանուկյանը:
Նա նշեց, որ ակնհայտ է` սիրիական իշխանությունները նախաձեռնություններն իրենց ձեռքն են վերցրել՝ սկսած մայիսի վերջից և հունիսի սկզբից, երբ սիրական զորքերը գրավեցին մեկ տարի առաջ կորցրած Քուսեյր քաղաքը, որը կապում էր Սիրիան Լիբանանի հետ: Ըստ նրա`եթե քարտեզին նայենք, կտեսնենք, որ դա ամենակարճ ճանապարհն է Լիբանանից դեպի Հյուսիսային Սիրիա, հենց այդ ճանապարհով էր կատարվում սիրիական ընդդիմությանը զենքի ու ֆինանսների մատակարարումը: Գրավեցին և սկսեցին Հալեպի օպերացիան:
«Հայտարարվեց, որ դա բոլոր ճակատամարտերի մայրն է: Սա Բաշար Ալ-Ասադի բնորոշումն է, այնինչ Հալեպի համար պայքարն արդեն տասնմեկ ամիս է` տևում է, բայց հիմա սիրիական զորքերն իրական ժամկետ նշեցին, որ պետք է ավարտեն այս օպերացիան»,- ասաց արևելագետը:
Նրա խոսքերով` Բաշար Ալ-Ասադն ասել է, որ մինչև աշուն հարցերը լուծված կլինեն։ Սա, ըստ բանախոսի, առաջին անգամ է, որ սիրիական իշխանությունները հստակ ժամկետ են նշում:
