Այսօր «Տեսակետ» ակումբի հյուրերն էին IBF intercontinental վարկածով չեմպիոն Կարո Մուրադն ու նրա եղբայրը` դարձյալ պրոֆեսիոնալ բռնցքամարտիկ Կոկո Մուրադը: Ասուլիսի սկզբում Կարոն ներկայացրեց մայիսի 7-ին նվաճած չեմպիոնական գոտին, այնուհետև պատմեց մարտից ու իր կյանքից:
«Վերջին մենամարտս եղել է մայիսի 7-ին, որում հաղթել եմ այս գոտին և ճանաչվել IBF intercontinental-ի չեմպիոն»: IBF-ի վարկանիշային աղյուսակում արդեն երրորդն եմ: Հուսով եմ, որ մինչև տարվա վերջը կմենամարտեմ աշխարհի չեմպիոնի գոտու համար և հաղթանակով կվերադառնամ հայրենիք:
Մրցակիցս Օթիս Գրիֆինն էր` ամերիկացի ճանաչված բռնցքամարտիկ: Շատ ծանր մարտ էր ինձ համար, բայց ես շատ լավ էի պարապել և հաղթեցի 11-րդ ռաունդում նոկաուտով:
Ծնվել եմ 1983 թվականի սեպտեմբերի 2-ին Էջմիածնում: 96 թ. ընտանիքով գնացել ենք Գերմանիա: Բռնցքամարտով զբաղվում եմ 13 տարեկանից»,- ասաց Կարո Մուրադն ու հավելեց, որ իր անունը Կարեն Մուրադյան է:
Անդրադառնալով Արթուր Աբրահամին և նրա կրած վերջին պարտությանը՝ Կարոն ասաց հետևյալը. «Ես ու Արթուրն իրար լավ ենք ճանաչում, մենք լավ ընկերներ ենք: Արթուրի մարտը չէր ստացվում Անդրե Ուորդի հետ, որովհետև Ուորդը շատ էր շարժվում, իսկ Արթուրը չէր հասցնում իր ծանր հարվածներն անցկացնել: Արթուրն իմ ընկերն է, և չէի ցանկանա ընկերոջս հետ մենամարտել: Կհրաժարվեի»:
Կարո Մուրադը մտերիմ է նաև Սյուզի Կենտիկյանի հետ. «Սյուզիի հետ նույնպես մտերիմ եմ, բայց կանանց բռնցքամարտին դեմ եմ: Չեմ սիրում, երբ աղջկա քթից արյուն է գալիս, կամ աչքը կապտում, բայց Սյուզիին՝ որպես սպորտսմենուհու, շատ եմ սիրում»:
«Ինչն էր ամենաշատը կարոտել» հարցին Կարոն պատասխանեց՝ «Ցոգոլը»: