Այսօր լրագրողների հետ հանդիպման ժամանակ միգրացիոն պետական ծառայության պետ Գագիկ Եգանյանը ներկայացրեց ՌԴ կողմից Հայաստանում իրականացվող «Համերկրացիների վերաբնակեցման ծրագրի» վերաբերյալ թվային տվյալներ։ Գ. Եգանյանի խոսքով՝ այս ծրագիրը հաստատվել է ՌԴ նախագահի կողմից 2006 թ., և նմանատիպ ծրագրի իրականացումը «յուրաքանչյուր պետության ինքնիշխան իրավունքն է»։
Իսկ թվերը հետևյալն են. 2007 թվից մինչև 2010 թվի հոկտեմբերը ծրագրի վերաբերյալ տեղեկություններ ստանալու հարցով դիմել են 13 հազար 677 քաղաքացիներ, իսկ դրան հաջորդող ընդամենը 7 ամսվա ընթացքում՝ 12 հազար 321 անձինք։ Հետաքրքրության նման կտրուկ աճը Գ. Եգանյանը պայմանավորեց այս հարցի վերաբեյալ մեր ԶԼՄ-ների հրապարակումներով և հանրային քննարկումներով։ «Սա պայմանավորված է միայն այն աժիոտաժով, որ այս խնդրի նկատմամբ նաև ԶԼՄ-ներով տարածվում է բնակչության շրջանում»,- ասաց Գ. Եգանյանը։
Ըստ նրա՝ դիմած ընդամենը մոտ 26 հազար քաղաքացիներից միայն 2919 անձ է ցանկություն հայտնել մասնակցել ծրագրին և համապատասխան փաստաթղթեր լրացնել։ «Նրանցից 822-ն է ստացել վերաբնակչի կարգավիճակ, որից անցած 4 տարիների ընթացքում ՌԴ է մեկնել 626 ընտանիք՝ 1508 անդամով։ Անշուշտ, սա մեր երկրի համար անցանկալի միգրացիոն հոսք է, քանի որ մշտական վերաբնակեցմամբ է ավարտվում։ Բայց հավատացնում եմ, որ այս թվերը, այս հոսքերը ավելի շատ պայմանավորված են այս հարցի նկատմամբ բնակչության մոտ անհարկի հետաքրքրություն ստեղծելով»,- ասաց Գ. Եգանյանը։
