Բնապահպան Կարինե Դանիելյանը մամուլի ասուլիսի ժամանակ նշեց, որ ուրանի հանքի շահագործման ծրագիրը իրենց համար սկզբունքորեն ընդունելի չէ: Ըստ բնապահպանի` այսօր չկան այնպիսի տեխնոլոգիաներ, որպեսզի ուրանային հանքարդյունահանումից շրջակա միջավայրը չաղտոտվի: Կարինե Դանիելյանի կարծիքով` ուրանի հանքի շահագործման դեպքում չեն զարգանա գյուղատնտեսությունը և տուրիզմը, որոնք տնտեսական օգուտ են բերում երկրին: Բնապահպանն ուշադրություն է հրավիրում այն հանգամանքի վրա, որ Հայաստանի տարածքը ոչ միայն փոքր է, այլև սեյսմիկ տեսանկյունից վտանգավոր: Կարինե Դանիելյանը հայտարարեց, որ երկրաշարժի դեպքում վնասներն ակնհայտ կլինեն: «Հսկայական Ռուսաստանն իրեն կարող է թույլ տալ և՛ ընդերքը շահագործել, և՛ գյուղատնտեսությունը զարգացնել: Կանադան, Չինաստանն էլ, ԱՄՆ-ն էլ կարող են իրենց թույլ տալ դա: Մենք այս փոքր տարածքում այսօր ունենք շուրջ տասնհինգ պոչամբար, թունաքիմիկատների երկու խիստ վտանգավոր գերեզմանոց: Մենք այսպես երկիրը թույնով կծածկենք: Սրանից արտագաղթի նոր ալիք է սկսվելու»,- ասաց նա: