Եմենն անվտանգության աննախադեպ միջոցառումներ է կիրառել կառավարական հաստատությունների և այլ օբյեկտների պաշտպանության համար: Այդ հաստատությունները կարող են գրոհայինների համար թիրախ դառնալ՝ «Ալ-Կաիդա»-ի հարձակումների սպառնալիքի հետ կապված: Մայրաքաղաք Սանայում տեղակայվել է հարյուրավոր միավոր զրահատեխնիկա, հաղորդում է BBC-ն:
Եմենի իշխանությունները չորեքշաբթի օրը հայտարարել են այն մասին, որ իրենց հաջողվել է կանխել նավթամուղները պայթեցնելու և երկրի գլխավոր նավահանգիստները բռնազավթելու «Ալ-Կաիդա»-ի ծրագրերը:
Հիշեցնենք, որ այս շաբաթվա ընթացքում ԱՄՆ-ը և Արևմուտքի այլ երկրներ հետ են կանչել Եմենում իրենց դեսպանատների աշխատակիցներին:
Նշվում է նաև, որ ԱՄՆ-ը պատրաստում է իր ուժերն «Ալ-Կաիդա»-ի ակտիվիստներին հնարավոր հարված հասցնելու համար: Չորեքշաբթի օրը երկրի հարավում գտնվող Շվաբա գավառում ամերիկացիների անօդաչու սարքի հարվածներից զոհվել են ահաբեկչական խմբավորման 7 անդամներ:
