Ինչպես գրում է The Sunday Times-ը, Ռուսաստանի վարչապետ Վլադիմիր Պուտինն առաջադրվելու է հաջորդ տարվա նախագահական ընտրությունների ժամանակ: Այդպիսով նրա հակասությունները գործող նախագահ Դմիտրի Մեդվեդևի հետ կուժեղանան: «Պուտինը մասնակցելու է նախագահական ընտրություններին: Նա որոշել է: Ասեկոսեներն այն մասին, թե նա դեռ գնահատում է տարբերակները, չեն համապատասխանում իրականությանը»,- թերթին հայտնել է սեփական աղբյուրը Մոսկվայում:
Մոսկվայում լուրեր են պտտվում, որ գործող նախագահ Մեդվեդևը նույնպես ցանկանում է մասնակցել ընտրություններին: Այս ֆոնի վրա սրվել են ժամանակին մտերիմ հարաբերությունները կոշտ, КГБ-ի նախկին աշխատակից Վլադիմիր Պուտինի և Twitter-ի օգտատեր Դմիտրի Մեդվեդևի միջև:
Ըստ The Sunday Times-ի` երկուսն էլ իրենց տեսնում են հաջորդ նախագահի պաշտոնում: Երկու առաջնորդների հետ մտերիմ մարդիկ հայտնում են, որ Պուտինը սկսել է կորցնել Մեդվեդևի լոյալության վերաբերյալ իր վստահությունը: Մեդվեդևի կողմից վերջերս հնչեցված քննադատությունը Պուտինի մեջ կասկածներ է առաջացրել: «Վարչապետի շրջապատում կարծում են, որ Մեդվեդևը սկսել է իրեն շատ ամբարտավան պահել և փորձում է մրցակցել վարչապետի հետ»,- գրում է թերթը:
Սկզբում Մեդվեդևին համարում էին խամաճիկ: Նա նույնիսկ փորձում էր նմանվել Պուտինին, դառնալ նրա պես մաչո` կրկնելով նրա շփման մեթոդները: Սակայն երեք տարի անց Մեդվեդևը արդեն փորձում է չզիջել վարչապետին: Նախագահին դուր չի գալիս, որ նրան համարում են «անճոռնի ճուտիկ»: Երկրորդ ժամկետը Մեդվեդևին թույլ կտա իրականացնել մեծ քաղաքական և դատական բարեփոխումեր, ինչպես նաև ազատականացնել հասարակությունը:
«Սա պատմության դասական օրինակ է. աշակերտը փորձում է հաղթել իր ուսուցչին»,- եզրակացնում է թերթը: «Նրանց միջև մրցակցություն կա, սակայն նրանք բավական խելացի են, որ թաղվեն անձնական տհաճ հակամարտության մեջ»։