Առաջիկա խորհրդարանական ընտրություններում կուսակցությունների հնարավորությունների մասին խոսելիս՝ ՀՀԿ փոխնախագահ Ռազմիկ Զոհրաբյանը նկատեց, որ ընդդիմադիր դաշտից խորհրդարանում ձայներ ունենալու հնարավորություն ունեն ՀԱԿ-ը, ՀՅԴ-ն ու «Ժառանգությունը». «Եթե ՀԱԿ-ը շարունակի ժողովրդավար, սահմանադրական ճանապարհով պայքարել, ապա հաստատ ձայներ կունենա ապագա ԱԺ-ում, իսկ եթե 2008 թ. դեպքերը կրկնի, ժողովուրդը վերջնականապես կհիասթափվի ՀԱԿ-ից»։
Գագիկ Ծառուկյանի հայտարարությունը, թե առաջիկա խորհրդարանական ընտրություններում ԲՀԿ-ն 50+1տոկոս ձայն է հավաքելու, իսկ Վարդան Բոստանջյան էլ իր կողմից այդ թիվը հասցրել է 99.9 տոկոսի, Զոհրաբյանի գնահատմամբ, այդ կուսակցության ցանկություններն են և ոչինչ ավելին. «Բոստանջյանն անգամ հումորով նման բան չպետք է ասեր։ Աստված չանի, որ ԲՀԿ-ն 99.9 տոկոս ձայն հավաքի, դա կլինի դիկտատուրա»։
ՀՀԿ փոխնախագահը համոզված է, որ խորհրդարանական մեծամասնությունը պատկանելու է ՀՀԿ-ին. «Մենք լավ գիտենք, թե ովքեր են ուժեղ։ Համայնքների 2/3-րդը աջակցում է ՀՀԿ-ին, իսկ ԲՀԿ-ին է պատկանում ամեն յոթերորդ համայնք։ Ահարոն Ադիբեկյանի սոցիոլոգիական հետազոտություններն էլ են վկայում, որ ՀՀԿ-ն մեծմասնություն է կազմելու։ Ես Ադիբեկյանին համարում եմ լուրջ գիտնական, քանզի նրա կանխատեսումները միշտ ճիշտ են եղել»։
Քրեակատարողական հիմնարկում Նիկոլ Փաշինյանի նկատմամբ կիրառված բռնության շուրջ ստեղծված աղմուկը, ըստ ՀՀԿ փոխնախագահ Ռազմիկ Զոհրաբյանի, պարզապես չափազանցություն է։ «Ես շատ լավ գիտեմ, թե ինչ է կատարվում ՔԿՀ-ում, և համոզված եմ, որ լուրջ բան չի եղել։ Պարզապես այդ անձն այնքան քաղաքականացված է, որ եթե նրա կողքով անգամ «տառական» անցնի, էլի կքաղաքականացնեն և մեծ աղմուկ կբարձրացնեն»։
Գործի առնչությամբ հետաքննություն իրականացնելու անհրաժեշտության մասին խոսելով՝ Զոհրաբյանը համոզված ասաց, որ տվյալ հիմնարկությունում արդեն իսկ հետաքննություն կատարվում է։ ՀՀԿ փոխնախագահը նաև հավելեց, որ Նիկոլ Փաշինյանը միշտ էլ վերամբարձ և վիրավորական հայտարարություններ է անում, ինչը վայել չէ քաղաքական գործչին. «Նա իր նման պահվածքով ոչ թե քաղաքական գործիչ է, այլ դեղին մամուլի ներկայացուցիչ»։