«Եթե ընդամենը 5%-ն են դեկրետ գնացող այն կանայք, որոնք ստանում են 162.5 հազար դրամից ավելի բարձր աշխատավարձ, ապա ի՞նչն էր ստիպում նման սահմանափակում մտցնել»,- «Առաջին լրատվական»-ի հետ զրույցում ասաց Արդյունաբերողների և գործարարների միության փոխնախագահ Գագիկ Մակարյանը`անդրադառնալով ժամանակավոր անաշխատունակության վերաբերյալ օրենքի նախագծի՝ ԱԺ-ում երրորդ ընթերցմամբ ընդունմանը: Հիշեցնենք, որ երեկ աշխատանքի և սոցիալական հարցերի փոխնախարար Արտեմ Ասատրյանը հայտարարել էր, թե դեկրետ գնալու ենթակա կանանց միայն 5%-ն են 162.5 հազար դրամից բարձր ստանում, հետևաբար նպաստի չափի սահմանափակումը միայն նրանց վրա կարող է տարածվել: «Ընդհակառակը, մենք պետք է ձգտենք, որ մյուսները ավելի շատ վաստակեն, և այդ 5%-ը մեծանա: Այսինքն` մենք պետք է կարողանանք արժանապատիվ աշխատանքի պայմանները լավացնել»,- նշեց Գ. Մակարյանը: Ինչ վերաբերում է փոխնախարարի այն պնդմանը, թե գործատուների տված կեղծ տեղեկանքների հիման վրա երբեմն շատ բարձր նպաստներ էին նշանակվում, և այս խնդիրը նոր կարգով արդեն ըստ էության լուծվում է, Գ. Մակարյանը հակադարձեց. «Նախարարի մոտ քննարկման ժամանակ այդ խոսակցությունը եղավ։ Ո՛չ արհմիությունները, ո՛չ մենք նման տեղեկություններ չունենք: Եվ իրենք էլ չունեն: Ուղղակի օդից վերցված տեսակետ է՝ իրենց արդարացնելու համար»:
