Նախագահ Վլադիմիր Պուտինը «ուրախ է Թրամփի հաղթանակի կապակցությամբ», գրում է Յուլիան Հանսը Sueddeutsche Zeitung թերթում՝ հիշեցնելով, որ ռուսական Պետդուման համապատասխան նորությունն ընդունեց ծափահարություններով, իսկ Պուտինը շտապեց որքան հնարավոր է շուտ շնորհավորել հաղթողին և հույս հայտնել, որ միասին «ռուս-ամերիկյան հարաբերությունները դուրս կբերեն ճգնաժամից»։
Միևնույն ժամանակ ոչ մի վստահություն չկա, որ Թրամփի իշխանության գալով կսկսվի բարեկամության նոր դարաշրջան Ռուսաստանի և Միացյալ Նահանգների միջև՝ ընդգծում է հոդվածագիրը և միևնույն ժամանակ նշում, որ նախկինում Մոսկվան ավելի հեշտ լեզու է գտել հանրապետական նախագահների հետ, իսկ անցած տարի Թրամփը և Պուտինը հաճոյախոսություններով են փոխանակվել։
Թրամփն իրենից ներկայացնում է դասական հանրապետական՝ պնդում է հեղինակը , և նախընտրական քարոզարշավի ժամանակ բավականին հակասական հայտարարություններ է արել Ռուսաստանի վերաբերյալ։ Նա հայտարարել է Ղրիմի հավանական ճանաչման մասին և կասկածի տակ է դրել ԱՄՆ-ի կողմից մերձբալթյան երկրներին ցուցաբերվող օգնությունը, եթե նրանց դեմ հարձակվում է Ռուսաստանը, միևնույն ժամանակ հայտարարել է, որ կհրամայի խփել ռուսական ինքնաթիռներին, եթե դրանք կրկին մոտենան ամերիկյան նավերին։
Իսկ Թրամփի վերջին տեսանյութում Պուտինը և ԴԱԻՇ ահաբեկչական խմբավորումը դիտարկվում են նույն տեսանկյունից և համարվում են «ԱՄՆ-ի ամենաոխերիմ թշնամիները»։
Հոդվածագրի կարծիքով՝ արմատական փոփոխություն կլինի հակամարտությունների լուծման հարցում։ Օբաման երկար ժամանակ անտեսել է Պուտինին, խուսափել հանդիպումից և Մոսկվայի հետ խոսել է պատժամիջոցների լեզվով։ Թրամփը վեճերը կլուծի երկխոսության միջոցով՝ դեմ առ դեմ, ինչը համապատասխանում է պուտինյան ոճին։
Ռուսաստանը վաղուց է ցանկանում, որ խոշոր գերտերությունները խնդիրները լուծեն բացառապես իրար մեջ։ Ավելի փոքր և թույլ պետությունները ստիպված կլինեն պատրաստվել, քանի որ ծանր ժամանակներ են գալու։ Իսկ ուկրաինական հակամարտության համար պայքարում Եվրամիությունը և առաջին հերթին Անգելա Մերկելը շատ շուտով կարող են մնալ առանց կարևոր դաշնակցի՝ եզրափակում է հոդվածագիրը։