Հայաստանի ֆինանսական համակարգը 2016 թվականի առաջին կիսամյակում կրել է նախորդ տարվա ռիսկերի նյութականացման հետևանքով առաջացած վնասները: ՀՀ կենտրոնական բանկի ձեռնարկած գործողությունների շնորհիվ հնարավոր է եղել ոչ միայն պահպանել ֆինանսական շուկաների կայունությունը, այլև որոշակի աճ արձանագրել վարկավորման ու ավանդների ներգրավման մասով: Այդ մասին նշված է 2016 թ. առաջին կիսամյակի ԿԲ ֆինանսական կայունության հաշվետվության մեջ:
Ըստ ԿԲ-ի՝ միջազգային շուկաներում 2016 թ. առաջին կիսամյակում պահպանվել է գունավոր մետաղների գների, ՀՀ-ում ներքին սպառման, ինչպես նաև օտարերկրյա ներդրումների նվազումը: Աշխարհաքաղաքական զարգացումներով պայմանավորված՝ Ռուսաստանի Դաշնությունում պահպանվել է տնտեսական անկումը, ինչն իր հերթին բացասաբար է ազդել ՀՀ փոխանցվող մասնավոր տրանսֆերտների և ՌԴ արտահանվող ապրանքների ծավալների վրա:
«Համաշխարհային տնտեսության աճի վերականգնումը, նախկինում տրված գնահատականների համեմատ, ավելի թույլ է եղել: Աշխարհաքաղաքական անհամաձայնությունները նպաստել են համաշխարհային առևտրի կրճատմանն ու մի շարք բորսայական ապրանքատեսակների գների նվազմանը: Զարգացող և զարգացած երկրների դրամավարկային մարմինները պահպանել են տնտեսական աճի խթանմանը նպաստող ընդլայնողական դրամավարկային քաղաքականության ուղղությունը: Տարվա ընթացքում պահպանվել է դրամավարկային քաղաքականության տոկոսադրույքների ցածր մակարդակը: Տնտեսական աճի տեմպերի դանդաղմանը զուգընթաց, զարգացող երկրներում շարունակվել է կապիտալի արտահոսքը»,- նշված է հաշվետվության մեջ:
Դրանում նշվում է, որ ՀՀ-ի հիմնական առևտրային գործընկեր Եվրամիության երկրներում և Ռուսաստանում տնտեսական զարգացումներն անբարենպաստ են եղել, և դրանց բացսական ազդեցությունը ներքին շուկայի վրա դեռևս շոշափելի է:
2016 թ. առաջին կիսամյակում ՀՀ տնտեսական աճը կազմել է 2.8 տոկոս (2015 թ.՝ 3.0 տոկոս), որը, ըստ էության, զգալի դանդաղել է առաջին եռամսյակում արձանագրված բավականին բարձր աճի համեմատ (4.4 տոկոս): Աճին նպաստել է արդյունաբերության ճյուղում արձանագրված աճը, որը գերազանցել է կանխատեսված մակարդակը: Ձևավորված գնանկումային միջավայրի պայմաններում ՀՀ կենտրոնական բանկի կողմից զգալիորեն թուլացվել են դրամավարկային պայմանները, ինչը մեղմել է մասնավոր սպառման և մասնավոր ներդրումների նվազման ազդեցությունը ներքին պահանջարկի վրա: Տնտեսական աճի կայունության հետ կապված ռիսկերի պահպանման և համախառն իրական տնօրինվող եկամտի թույլ աճի պայմաններում բանկային համակարգի շահութաբերության ցուցանիշները նվազել են:
Միևնույն ժամանակ, առևտրային բանկերին հաջողվել է ընդլայնել վարկային ու ավանդային պորտֆելները, բարելավել կապիտալի համարժեքությունն ու իրացվելիությունը: Վերջիններիս մասնավորապես նպաստել են ԿԲ կողմից ընդհանուր կապիտալի նվազագույն սահմանաչափի բարձրացման պայմաններում բանկերի կողմից կանոնադրական կապիտալի համալրումները: Ֆինանսական համակարգի ռիսկերի աճի միտումներ չեն դիտարկվել. դրանք շարունակում են մնալ կառավարելի շրջանակում՝ չառաջացնելով ֆինանսական կայունության ապահովման խնդիրներ:
