Քչերը գիտեն, որ իսլամիստական արտասահմանյան մի շարք կազմակերպություններ, որոնք ԱՄՆ-ը և Եվրոպան ճանաչել են որպես ահաբեկչական, կռվում են Սիրիայի նախագահ Բաշար Ալ-Ասադի և նրա դաշնակիցների՝ Ռուսաստանի և Իրանի կողմից: Այս մասին գրում է Bild գերմանական տաբլոիդը։
Համապատասխան ցուցակը, որում ներառված են 66 արտասահմանյան շիական կազմակերպություններ, կազմել են սիրիացի ակտիվիստները և հրապարակել Twitter-ում։
«Ամենամեծ կոնտինգենտը իրանական հեղափոխական գվարդիան է, որի կազմում «Ֆաթիմիյուն» աֆղանական ջոկատն է… Իմ տվյալներով՝ մարտիկների հստակ թվաքանակը 10-12 հազար է։ Ասադի կողմից մարտնչում է նաև Եվրոպայում ահաբեկչական հռչակված «Հըզբոլլահ» լիբանանյան կազմակերպությունը, որը Սիրիայում ունի 6-8 հազար գրոհային»,- ասել է Սիրիայի հարցով փորձագետ Միխայել Խորովիցը։
Մեկ այլ կազմակերպություն, որը քողարկված մասնակցում է Սիրիայում մարտական գործողություններին, իրաքյան «Քաթաիբ Հըզբոլլահ»-ն է։ ԱՄՆ-ում այն համարվում է ահաբեկչական կազմակերպություն, քանի որ 2000-ականներին Իրաքում պատերազմի ժամանակ սպանել է հարյուրավոր ամերիկացի զինվորների։
Բացի այդ, պարբերականը գրում է, որ Իրանը մինչ աֆղան ընտանիքներին փախստականի կարգավիճակ շնորհելը՝ նրանց առաջ պայման է դնում, այն է՝ տղամարդիկ պետք է մեկնեն Սիրիա պատերազմի։ Human Rights Watch կազմակերպության տվյալներով՝ այդ կերպ են վարվել հազարավոր աֆղանների հետ։
«Նրանցից շատերին սպառնում է արտաքսում, եթե չդիմեն այդ քայլին»,- ասել է կազմակերպության ղեկավարներից մեկը՝ Փիթեր Բուկերտը։
