Այսօր կայացան Հայաստանի առաջնության 10-րդ տուրի վերջին երկու հանդիպումները: Կենտրոնական հանդիպումը կայացավ «Հրազդան» մարզադաշտում, որտեղ գործող չեմպիոն «Փյունիկ»-ը հյուրընկալեց ընթացիկ առաջնության առաջատար «Ուլիս»-ին:
Մինչև 60-րդ րոպեն խաղադաշտում ընդամենը 1 թիմ էր խաղում. «Ուլիս»-ի գործողությունները ոչ միայն առաջատարին վայել չէին, այլև ընդհանրապես թիմի տպավորություն չէին թողնում:
Վարդան Մինասյանի սաները հանդիպման սկզբից տիրեցին նախաձեռնությանն ու արդեն 17-րդ րոպեին Մարկոսը բացեց հաշիվը: 35-րդ րոպեին Հովհաննես Հովհաննիսյանը Մարկոսի գեղեցիկ փոխանցումից հետո կրկնապատկեց այն: Մինչ այդ «Փյունիկ»-ն առնվազը երկու անգամ էլ կարող էր գոլի հեղինակ դառնալ: Ինչևէ առաջին խաղակեսն ավարտվեց 2:0 հաշվով: Երկրորդ խաղակեսի մեկնարկը նույնպես անցավ չեմպիոնի թելադրանքով: 50-րդ րոպեին Հովհաննես Հովհաննիսյանը խփեց իր` երկրորդ, «Փյունիկ»-ի երրորդ գնդակն այս խաղում:
Միայն 62-րդ րոպեին հյուրերին հաջողվեց վտանգավոր գրոհ անցկացնել, որն ավարտվեց դարպասի գրավումով: «Ուլիս»-ի կազմում աչքի ընկավ 52-րդ րոպեին փոխարինման մտած Դավիթ Գրիգորյանը: Խփած գոլից հետո «Ուլիս»-ը սկսեց թիմի տպավորություն թողնել և մի քանի վտանգավոր գրոհ կազմակերպեց, այդուհանդերձ «Փյունիկ»-ի ֆուտբոլիստները շատ ավելի մոտ էին հաշիվը խոշոր դարձնելուն, քան «Ուլիս»-ը` կրճատելուն: «Փյունիկ»-«Ոլիս»` 3:1: Չեմպիոնը հաղթեց և միավորներով հավասարվեց առաջատարին:
Օրվա մյուս խաղում ուժերը չափեցին Հայաստանի առաջնության ամենաշատ երկրպագուներ ունեցող թիմերը. Գյումրիի «Շիրակ»-ը Իջևանի «Արնար» մարզադաշտում ընդունեց Կապանի «Գանձասար»-ին ու չկարողացավ լուրջ դիմադրություն ցույց տալ:
Չնայած այս խաղում երկու թիմերն էլ արժանի ֆուտբոլ էին ցուցադրում, կապանցիների առավելությունն ակնհայտ էր: Արդյունքում «Գանձասար»-ը երկու անպատասխան գնդակ ուղարկեց գյումրեցիների դարպասն ու վաստակած 19 միավորով ընդհուպ մոտեցավ առաջատարներին, գոլերի հեղինակներ դարձան Վլադիմիր Մատիչն ու Արթուր Քոչարյանը:
10-րդ տուրից հետո մրցաշարային աղյուսակն ունի հետևյալ տեսքը.
1.«Փյունիկ» 20 մ.
2.«Ուլիս» 20 մ.
3.«Գանձասար» 19 մ.
4.«Միկա» 15 մ.
5.«Իմպուլս» 14 մ.
6.«Շիրակ» 9 մ.
7.«Բանանց» 7 մ.
8.«Արարատ» 5 մ.
Լուսանկարը` Հակոբ Բերբերյանի (Armenpress)