Նախորդ շաբաթ ցորենի գինը համաշխարհային շուկայում 17 տոկոսով թանկացավ: Այսօր սպառողների ազգային ասոցիացիայի նախագահ Արմեն Պողոսյանը մեզ հետ զրույցում նշեց, որ «մերոնք տեղի թե անտեղի միանշանակ կօգտվեն այդ առիթից»: Ավելին՝ նրա խոսքերով, ճիշտ է` համաշխարհային շուկայում ցորենի գինը բարձրանում է, բայց մեզ մոտ հա՛մ ավելի կտրուկ է բարձրանում, հա՛մ էլ թաքնված, քողարկված, ինչը, ըստ նրա, ավելի սարսափելի է:
«Այսպես, քաշը կեղծելով մի այլ ձևի թաքուն թանկացում է Հայաստանում գլուխ բարձրացրել: Օրինակ` եթե մարդը գնում է հաց, որի դիմաց վճարել է 240 դրամ, և այդ հացը կշռում է 200 գրամ, ստացվում է, որ 2000 դրամից ավելի թանկ է այդ հացը (իրականում` 1200 դրամ – 1in.am): Իսկ այդպիսի գին գոյություն չունի ո՛չ Չիկագոյում, ո՛չ էլ Ֆրանկֆուրտում: Ավելին՝ հենց Չիկագոյում և Ֆրանկֆուրտում է ձևավորվում հացի գինը: Ցանկանում եմ ասել, որ այնպիսի թռիչքային գներ, ինչպիսին որ Հայաստանում է` գոյություն չունի աշխարհի և ոչ մի անկյունում»,- պարզաբանեց Արմեն Պողոսյանը: