Ռուսաստանն արդեն արել է այն ամենը, ինչով կարող էր վնասել Վրաստանին։ Հուսով ենք, որ սրանից հետո հարաբերությունները միայն կլավանան, քանզի ավելի վատ արդեն չի կարող լինել: Այդ մասին, ըստ Civil.ge-ի` հայտարարել է Վրաստանի նախագահ Միխեիլ Սաակաշվիլին: «Բոլոր նրանք, ովքեր կարծում են, որ մենք չպետք է բռնենք լրտեսներին կամ խոսենք մեր արժանապատվության մասին, որպեսզի չգրգռենք նրանց, պետք է հասկանան, որ նախկին խորհրդային բոլոր հանրապետություններն էլ խնդիրներ ունեն նրանց հետ։ Իսկ այն, որ Վրաստանի խնդիրներն ավելի շատ են, զարմանալի չէ, քանի որ վրացիները ամենաանկախ ժողովուրդն են նախկին խորհրդային հանրապետություններից»,- նշել Է Սաակաշվիլին: «Նրանք ցանկանում են տիրանալ Վրաստանի գեղեցկությանը և ծով դուրս գալ. դա բնազդ է, և պատճառը բնավ էլ այն չէ, որ նրանց դուր չի գալիս Սաակաշվիլին կամ իմ ինչ-ինչ ֆիզիկական պարամետրերը»,- ասել է նախագահը: Նրա խոսքով՝ «Վրաստանի լավագույն զենքը լավ կրթությունն է»: