Այսօր կայացան Հայաստանի առաջնության 10-րդ տուրի առաջին երկու հանդիպումները: «Արարատ»-ը «Հրազդան» մարզադաշտում ընդունեց «Իմպուլս»-ին ու ընթացիկ առաջնությունում տարավ իր առաջին հաղթանակը:
14-րդ րոպեին հանդիպման հաշիվը բացեց Արա Հակոբյանը, 4 րոպե անց Ռաֆայել Սաֆարյանը կրկնապատկեց այն: 75-րդ րոպեին Արտակ Հովհաննիսյանը կարողացավ կրճատել հաշվի տարբերությունը, սակայն ավելին անել դիլիջանցիներին չհաջողվեց: «Արարատ»-«Իմպուլս»` 2:1: Այս հաղթանակից հետո Հայաստանի ամենաանվանի թիմն իր ակտիվում ունի 5 միավոր և ընդամենը 2 միավորով է զիջում «Բանաց»-ին: «Իմպուլս»-ը 14 միավորով 5-րդն է:
Մյուս խաղում «Բանանց»-ն ու «Միկա»-ն հերթական արդյունավետ հանդիպումն անցկացրին: 19-րդ րոպեին հաշիվը բացեց Բրունո Կորեան: Առաջին խաղակեսի ավելացրած ժամանակում Ալեքսանդր Թադևոսյանի փոխանցումից հետո Ալեքսը գլխի դիպուկ հարվածով հավասարեցրեց այն: 49-րդ րոպեին «Բանաց»-ը կրկին առաջ անցավ. հեռահար հարվածով աչքի ընկավ Արտակ Դաշյանը: 4 րոպե անց Դոն Ֆունժուն հավասարեցրեց հաշիվը: Մնացած ժամանակում թիմերը կարող էին ևս մի քանի անգամ աչքի ընկնել, սակայն նոր գոլեր չգրանցվեցին: «Բանանց»-«Միկա»` 2:2:
Տուրի կենտրոնական հանդիպումը կկայանա վաղը. երկրորդ տեղում ընթացող «Փյունիկ»-ը «Հանրապետական» մարզադաշտում կընդունի առաջնության միանձնյա առաջատար «Ուլիս»-ին: Վաղը կայանալիք մյուս խաղում ուժերը կչափեն «Շիրակ»-ն ու «Գանձասար»-ը: