Ռուսական РИА Новости գործակալությունը հայտարարել է, որ հունիսի 12-ին Թուրքիայում կայանալիք խորհրդարանական ընտրություններից առաջ հարցախույզ չի անցկացրել Թուրքիայում և չի էլ պատվիրել դա, ինչպես որ ավելի վաղ ներկայացրել են թուրքական լրատվամիջոցները:
Այդ նպատակով գործակալությունը մտադիր է դիմել դատական մարմիններին` իր գործարար հեղինակության վերականգնման համար:
Օրեր առաջ թուրքական էլեկտրոնային լրատվամիջոցները տեղեկատվություն տարածեցին, որ հասարակական կարծիքի հետազոտման RIJA-SAM միջազգային կոնսորցիումը Թուրքիայի խորհրդարանական ընտրություններից առաջ 50.000 մարդկանց շրջանում հարցախույզ է անցկացրել Թուրքիայում: Դրան աջակցել է РИА Новости գործակալությունը, որը հետազոտության արդյունքները հրապարակել է իր պաշտոնական կայքում:
Այդ հարցախույզի արդյունքում Էրդողանի գլխավորած «Արդարություն ու զարգացում» կուսակցությունը (ԱԶԿ) ստացել էր մասնակիցների քվեների 32.14 տոկոսը, գլխավոր ընդդիմադիր ուժ, քեմալական ուղղությունը ներկայացնող «Ժողովրդա-հանրապետական» կուսակցությունը` 34.78 տոկոսը, «Ազգայնական շարժում» կուսակցությունը (ԱՇԿ)` 18.79 տոկոսը, քրդական «Խաղաղություն ու ժողովրդավարություն» կուսակցությունը (ԽԺԿ)` 6.43 տոկոսը, մնացածը` 7.68 տոկոսը:
Պետք է նշել, որ միանգամից երևում է, որ այս հարցախույզն ունի պատվիրատու, քանի որ ընդհանրապես չի արտացոլում քաղաքական կուսակցությունների հանդեպ թուրք հասարակության տրամադրվածության իրական պատկերը:
Հունիսի 12-ին կայանալիք ընտրությունների համար վերոնշյալ 4 կուսակցություններն իրենց համար կոնկրետ նշաձող են սահմանել և ընտրություններում պայքարելու են դրան հասնելու համար: ԱԶԿ-ի պարագայում խոսքը գնում է քվեների մինչև 50 տոկոսը հավաքելու մասին, ԺՀԿ-ն պայքարելու է քվեների 25 տոկոսի համար, իսկ ԱՇԿ-ն` թուրքական խորհրդարանում գոյատևման համար (10 տոկոս): Այդ հարցախույզից կարելի է համաձայնել միայն ԽԺԿ-ի արդյունքի հետ: