Ամերիկացի բարձրաստիճան պաշտոնյաները վստահ են, որ ԱՄՆ նախագահի թեկնածու Հիլարի Քլինթոնի և Դեմոկրատական կուսակցության ազգային կոմիտեի շտաբերի դեմ հաքերային հարձակումների հետևում կանգնած է Ռուսաստանը, որն այս կերպ փորձում է անորոշություն մտցնել ԱՄՆ-ի դեմոկրատական գործընթացում, գրում է The Wall Street Journal-ը։
Պարբերականը նշում է, որ Ռուսաստանը Fancy Bear և Cozy Bear անուններով հայտնի ցանցահեններին համացանցի լրտեսներից վերածել է քաղաքական ուժային գործիքի և ուղղել է երկրի հակառակորդների դեմ։
ՌԴ նախագահ Վլադիմիր Պուտինը հերքում է իր երկրի մասնակցությունն այդ հարձակումներին։
«Բոլորը խոսում են այն մասին, թե ով է կազմակերպիչը, բայց արդյոք դա է կարևոր։ Տեղեկատվության բովանդակություն․ ահա, թե ինչն է իրականում կարևոր»,-մեջբերում է պարբերականը Պուտինի խոսքերը։
Պարբերականն ուշադրություն է հրավիրում այն հանգամանքի վրա, որ հարձակումները տեղի են ունենում այն ժամանակ, երբ ռուսական անգլալեզու ԶԼՄ-ներն արշավ են սկսում և կենտրոնանում են արևմտյան ինստիտուտներում բացասական լուրերի վրա։
Ավելի վաղ Հիլարի Քլինթոնը հայտարարել էր, որ ԱՄՆ-ի քաղաքական կազմակերպությունների և ինստիտուտների դեմ կիբերհարձակում իրականացնելու հրաման տալիս է անձամբ Պուտինը։