Թուրքական Anadolu լրատվական գործակալության փոխանցմամբ՝ Թուրքիայի նախագահ Ռեջեփ Էրդողանը Անկարայում դատավորների ու դատախազների թեկնածուների հետ հանդիպման ժամանակ հայտարարել է, որ ռազմական հեղաշրջման փորձից հետո դատական համակարգից հեռացվել է 3456 դատավոր և դատախազ՝ առանց աշխատելու իրավունքի:
Էրդողանը չի համաձայնել այն կարծիքին, թե պետական կառույցները Ֆեթհուլլահ Գյուլենի կողմնակիցներից մաքրելու գործընթացի շրջանակներում գրանցվում են անհիմն ձերբակալություններ:
«Դա այդպես չէ, քանի որ դատական մարմիններն ու անվտանգության ուժերը բարեխղճորեն կատարում են իրենց աշխատանքը: Ես չեմ ասում, թե մենք ապահովագրված ենք սխալներից ու թյուրիմացությունից: Լինում են նաև նման բաներ:
Սակայն մի՛ մոռացեք, որ ռազմական հեղաշրջման փորձի հետևանքով զոհվել է 241 մարդ: Իսկ ո՞վ պատասխան կտա 2194 վիրավորի համար»,- ասել է նա:
Էրդողանը քննադատել է ԱՄՆ-ի իշխանությունների դիրքորոշումը Ֆեթհուլլահ Գյուլենին արտահանձնելու հարցում: «Թուրքական կողմը պահանջում է պատասխանատվության ենթարկել Գյուլենին, սակայն ամերիկյան կողմը վկայակոչում է դատական անկախ համակարգը:
Ընդ որում, ԱՄՆ իշխանությունները կարող են առանց դատի ու հետաքննության ձերբակալել ժամկետը 6 ամսով գերազանցած Թուրքիայի քաղաքացու: Այդպիսով, Թուրքիայի դատական համակարգը ավելի անկախ ու անկողմնակալ է»,- եզրակացրել է Էրդողանը:
