Վրացական GHN լրատվական գործակալության փոխանցմամբ, Կաննի կինոփառատոնում կայացել է «Օգոստոսի 5 օրը» ֆիլմի շնորհանդեսը: Դրան ներկա են եղել անվանի կինոքննադատներ, ռեժիսորներ, լրագրողներ և կինոինդուստրիայի ներկայացուցիչներ:
Ֆիլմը պատմում է 2008 թվականի օգոստոսին տեղի ունեցած ռուս-վրացական պատերազմի մասին: Ֆիլմի ռեժիսոր Ռեննի Հառլինը հայտարարել է, թե այս պատմությունն արժանի է նրան, որ այդ մասին իրազեկվի ողջ աշխարհը:
Ֆիլմի ցուցադրությունից հետո կազմակերպվել է ընդունելություն, որին ներկա է գտնվել 600 մարդ: Ֆիլմը ցուցադրվելու է ավելի քան 50 երկրներում (առաջնային պլանում են ԱՄՆ-ն ու Մեծ Բրիտանիան):
Վրաստանում ֆիլմի շնորհանդեսը կայանալու է հունիսի 5-ին: Ակնկալվում է, որ այդ նպատակով Վրաստան կայցելի ֆիլմի գլխավոր հերոսի դերակատար էնդի Գարսիան:
Հիշեցնենք, որ ֆիլմի նկարահանման աշխատանքները մեկնարկել են 2009 թվականի հոկտեմբերին, Թբիլիսիում: Դրան աջակցել են վրացական քաղաքական ու ռազմական իշխանությունները` տրամադրելով ռազմական հանդերձանք, տանկեր ու ուղղաթիռներ: Ֆիլմի բյուջեն կազմում է 50 միլիոն ամերիկյան դոլար: