Լոս Անջելեսի դատարանը պարտավորեցրել է դերասան և ռեժիսոր Մել Գիբսոնին իր նախկին ընկերուհուն $60,000 վճարել իրենց ընդհանուր դստերը պահելու համար:
Բացի ալիմենտի վճարումից՝ դատարանը նաև որոշում է կայացրել, համաձայն որի` Գիբսոնը այլևս չի կարող ընկերուհուց` Օկսանա Գրիգորևայից, պահանջել այն տան վարձավճարը, որտեղ վերջինս իր մոր և երեխայի հետ ապրում է: Այս մասին հայտնում է People ամսագիրը:
Երեխային պահելու համար նախատեսված գումարը սկզբում սահմանված է եղել $5,000, ապա աճել է մինչև $20,000-ի: Գիբսոնի դատապաշտպանները փորձել են գանգատարկել դատարանի որոշումը, սակայն դատավոր Սքոթ Գորդոնը, միևնույն է, որոշում է ընդունել հօգուտ Գրիգորևայի: Դատական հաջորդ նիստը, որում կքննվի երեխայի համատեղ խնամակալության հարցը, տեղի կունենա մոտ երկու ամսից:
Հիշեցնենք, որ Մելն ու Օկսանան հանդիպում էին 2009 թվից: Նրանց սիրավեպը Գիբսոնի և նրա կնոջ` Ռոբինի բաժանման պատճառ էր դարձել. ամուսինները միասին ապրել էին 28 տարի և ունեն 7 երեխա:
Նախորդ տարվա հոկտեմբերին Գրիգորևան աղջիկ էր ունեցել Գիբսոնից, սակայն մի քանի ամիս անց զույգը հայտարարել էր բաժանման մասին:
