Նիդերլանդների մի քանի պատգամավորներ երեկ հարցեր են ուղղել իրենց երկրի կառավարությանը` պարզելու նրա վերաբերմունքը Հայաստանում մարդու իրավունքների խախտումների նկատմամբ:
Արծարծված հարցերը վերաբերում են այդ ոլորտում եղած մի շարք խնդիրներին, մասնավորապես` Մարտի 1-ի դեպքերին և ՀՀ ԱԺ պատգամավոր Զարուհի Փոստանջյանի եղբոր ձերբակալությանը: Նիդերլանդների պատգամավորներն իրենց արտաքին գործերի նախարարին խնդրել են Նիդերլանդներում ՀՀ դեսպանից պարզել, թե ինչ առաջընթաց է գրանցվել Մարտի 1-ի գործի քննության հարցում, երբ ոստիկանական ուժերի գործադրած բռնության հետևանքով զոհվել է 10 մարդ:
Մի քանի հարց էլ ուղղվել է` կապված Տիգրան Փոստանջյանի հետ: Պատգամավորները, հղում անելով Transparency International-ի համապատասխան տեղեկատվությանը, մտահոգություն են հայտնում այն փաստի կապակցությամբ, որ Տ. Փոստանջյանը պահվում է շատ վատ պայմաններում: Նրանց մտահոգել է այն փաստը, որ հնարավոր է՝ դա ճնշման ձև լինի` ուղղված Տիգրանի քրոջը` պատգամավոր Զարուհի Փոստանջյանին: Պատգամավորներն իրենց արտգործնախարարից պահանջել են ՀՀ դեսպանից պարզել Տիգրան Փոստանջյանի ձերբակալության հանգամանքները, և՝ արդյո՞ք դա կապված չէ նրա քրոջ քաղաքական գործունեության հետ: Նաև նախարարին կոչ է արվել խնդրել ՀՀ-ում Նիդերլանդների դեսպանին այցելել Տ. Փոստանջյանին: