«Եվրոպայում այլևս չեն մնում բաց սահմաններ. այդպիսի լուրջ վտանգ գոյություն ունի»: Այս մասին RT հեռուստաալիքին տված հարցազրույցի ժամանակ ասել է Եվրոպայի խորհրդի գլխավոր քարտուղար Տորբյերն Յագլանդը: Նրա խոսքերով, բաց սահմաններն իրենց մեջ ունեն երկու վտանգ. «Առաջինը՝ միջազգային հանցագործությունն է, որն արդեն գոյություն ունի երկար տարիների ընթացքում, երկրորդը՝ Եվրոպայի սահմանների վրա ճնշումն է»,- հայտարարել է Յագլանդը:
Մեկնաբանելով այն փաստը, որ ամեն տարի միգրացիայի բազմահազարանոց ալիք է ուղղվում դեպի Եվրոպա` հատկապես արաբական աշխարհում տեղի ունեցող անկարգությունների հետևանքով, Յագլանդն ասել է, որ եվրոպական երկրներն ունակ չեն ընդունել այսպիսի քանակությամբ ներգաղթյալների:
«Ներգաղթյալների ընդունումը Եվրոպայի կողմից, ես նկատի ունեմ հատուկ հաստատությունների և հատուկ պատրաստված մարդկանց մասին, շատ սահմանափակ է: Այս բեռը չի կարելի բաժանել Շենգենյան գոտում գտնվող երկրների միջև: Արդեն հիմա պարզ է, որ դա մեծ խնդիր է լինելու, և ինչպես դուք տեսնում եք, շատ երկրներ արդեն փակել են իրենց սահմանները»,- ասել է Յագլանդը:
Հիշեցնենք, որ արաբական երկրներում տեղի ունեցող զարգացումներից հետո տասնյակ հազարավոր փախստականներ ուղղվեցին դեպի Եվրոպայի հարավային սահմաններ: Որոշ եվրոպական երկրներ հայտարարել են, որ պատրաստվում են Շենգենյան գոտում վերականգնել ներքին սահմանները, ինչը Եվրամիության ղեկավարության դժգոհությունն է առաջացրել, ինչպես նաև վտանգել է Շենգենյան գոտու գոյությունը: