«Առաջին լրատվական»-ի զրուցակիցն է «Սարդարապատ» շարժման նախաձեռնող խմբի անդամ, Շուշիի առանձնակի գումարտակի հրամանատար Ժիրայր Սէֆիլյանը
– Սերժ Սարգսյանը Մարտի 1-ի դեպքերը բացահայտելու հանձնարարական տվեց, եւ այժմ իրավապահ մարմինները վերսկսել են այդ գործի քննությունը: Ձեր կարծիքով, իշխանություններն իրապե՞ս կգնան Մարտի 1-ի դեպքերի բացահայտման:
– Այդ քայլերն իրենց մեջ պոպուլիզմ են պարունակում: Նպատակը պարզ է` ներքին ճակատը սիրաշահել` իբր թե նրանց պահանջներն է կատարում, մյուս կողմից` արտաքին ճնշումներից խուսանավել: Սերժ Սարգսյանն ԱԺ ընտրություններից մեկ ու կես, երկու տարի առաջ սկսել է քայլեր անել: Նա ունի ծրագիր, որի էությունը հետեւյալն է. մինչեւ 2012թ. ԱԺ ընտրությունների նախօրյակը քաղաքական սուտ դաշտը փոշիացնել այնպես, ինչպես արեցին 2007թ.: Միանշանակ է, որ այս իշխանության օրոք Մարտի 1-ի դեպքերի բացահայտում հնարավոր չէ, այլ մենք ընդամենը ականատես կլինենք քավության նոխազների:
– Ձեր կարծիքով, ովքե՞ր կլինեն այդ քավության նոխազները:
– Բնական է, որ քավության նոխազ կդառնան միջին ու ստորին օղակները, բայց ոչ առաջին էշելոնը:
– Այս համատեքստում ինչպե՞ս եք վերաբերվում Մարտի 1-ի վերաբերյալ Ռոբերտ Քոչարյանի վերջին հարցազրույցին: Դրանից մեկ շաբաթ անց հարցազրույց տվեց նաեւ նրա գրասենյակի ղեկավար Վիկտոր Սողոմոնյանը: Այսինքն` Քոչարյանական թեւից ինչ-որ անհանգստություն է նկատվում: Ձեր կարծիքով, ինչո՞վ է դա պայմանավորված:
– Կարծում եմ` ընդդիմադիր դաշտը սխալ է անում, երբ ամեն անգամ արձագանքում է այդ գործչին: Իմ համոզմամբ, ավելի ճիշտ կլինի ընդհանրապես արհամարհել ու մոռանալ այդ գործչին: Փոխարենը` զբաղվել մի գործով, որի արդյունքում մեզ պետք է հաջողվի օր առաջ ձերբազատվել այս ռեժիմից ու այդ մարդկանց օրինական դատարանի առաջ կանգնեցնել: Ուստի` ես արհամարհում եմ այդ գործչին ու չեմ պատրաստվում նրա հայտարարություններին որեւէ կերպ անդրադառնալ:
– Տպավորություն է, որ Սերժ Սարգսյանը, տալով Մարտի 1-ի դեպքերի բացահայտման հանձնարարականը, ավելի շատ փորձում է փակել Քոչարյանի` քաղաքականություն վերադարձի ճանապարհը, եւ Քոչարյանն էլ դրանից է անհանգստանում:
– Սերժ Սարգսյանն իր քայլերով տարբեր թիրախներ է փորձում խփել, փորձում է միաժամանակ տարբեր խնդիրներ լուծել: Բայց դա չի նշանակում, որ որեւէ հարցում նա որեւէ լուրջ, հիմնավոր փոփոխությունների է պատրաստվում գնալ, առավել եւս` գնալ նման ոճրագործության բացահայտման, ինչպիսին Մարտի 1-ն է: Բոլորս ենք տեղյակ, որ այդ ամենին մասնակից է նաեւ Սերժ Սարգսյանը: Եվ հնարավոր չի, որ ինքը սղոցի այն ճյուղը, որի վրա նստած է: Դա անտրամաբանական է: Չեմ հավատում:
– Այդ դեպքում, ինչո՞ւ էր Քոչարյանն ակնարկում, որ Մարտի 1-ին ինքը միայնակ չի գործել, այլ խորհրդակցել է Սերժ Սարգսյանի ու Տիգրան Թորոսյանի հետ, ինչո՞ւ է նա անհանգստացած:
– Արդեն ասացի, որ չեմ ուզում մեկնաբանել Քոչարյանի խոսքերը: Այդ գործչին պետք է ընդհանրապես արհամարհել:
– Իսկ նրա վերադարձը որքանո՞վ եք հավանական համարում: Կարծես թե նա ջանք չի խնայում իշխանության վերադառնալու համար:
– Վստահաբար կարող եմ պնդել, որ բացառվում է Ռոբերտ Քոչարյանի վերադարձը: Կարծում եմ` մեր ժողովուրդն ունի այն քաղաքական գիտակցությունը, որ թույլ չտա նրա քաղաքական վերակենդանացումը:
– Իսկ այդ գիտակցությունն ունե՞ն, արդյոք, այն քաղաքական ուժերը, որոնք համարվում են Քոչարյանի հնարավոր հենարանը: Գուցե հենց նրանք փորձեն քայլեր անել` Քոչարյանին ետ բերելու համար:
– Մեր երկրում շուտվանից, առավել եւս` այսօրվանից ու վաղվանից քաղաքական կուսակցությունները չէ, որ որոշելու են մեր երկրի ապագան:
– Իսկ ովքե՞ր են որոշելու:
– Քաղաքացիական նորաստեղծ շրջանակներում են ձեւավորվելու բոլոր ապագա փոփոխությունները, որ սպասվում են մեր երկրում: Ու եթե Սերժ Սարգսյանին հաջողվի քաղաքական դաշտը փոշիացնել, ապա քաղաքացիական նորաստեղծ շրջանակների դեպքում դա նրան չի հաջողվի: