Այսօր «Ղարաբաղյան խնդիրը Հայաստանում և միջազգային ասպարեզում. Նոր վիճակ, հին մոտեցումներ» թեմայով ՌԱՀՀԿ կազմակերպած սեմինար-քննարկման ժամանակ, ՌԱՀՀԿ տնօրեն Մանվելը Սարգսյանը նշեց. «Աշխարհը փոխվում է ամեն օր, և այդ փոփոխությանը զուգահեռ փոխվում է նաև առկա խնդիրների, կոնֆլիկտների բովանդակությունը»: Ըստ այդմ, բանախոսի կարծիքով, եթե մենք չհասկանանք բովանդակային այդ փոփոխությունները և շարունակենք պահել մեր մոտեցումը ստացիոնար, ունիվերսալ՝ 100 տարվա համար նախատեսված, կարող ենք փլուզել մեր ողջ քաղաքականությունը:
Սեմինարին զեկույցով ներկայացած մյուս բանախոսի՝ միջազգային իրավունքի մասնագետ Անդրեաս Ղուկասյանի դիտարկմամբ ևս պետք է ազատվել տարիների ընթացքում «մեր ճամպրուկում հավաքած կարծրատիպերից», որոնք մինչև այսօր հնարավորություն չեն տվել պարզ և հստակ իրադրություն ստեղծել պատկերացումների դաշտում, թե «մենք ո՞ւր ենք գնում, ի՞նչ ենք ուզում և ինչպե՞ս ենք պատկերացնում այս վիճահարույց խնդրի կարգավորումը, ինչպե՞ս ենք պատկերացնում մեր ազգի ապագան տարածաշրջանում, աշխարհում և հարևան պետությունների հետ հարաբերություններում»:
Ըստ զեկուցողների՝ ղարաբաղյան խնդրի հետ կապված շատ հարցեր, որոնք պարզաբանման, ընկալման կարիք ունեն, մնում են անպատասխան, ուստի խորհուրդ էին տալիս նոր ձևավորվող քաղաքական ուժերին, նոր սերնդի ներկայացուցիչներին միավորվել, ազատվել ձևավորված կարծրատիպային մոտեցումներից և խնդիրը դիտարկել աշխարհում տեղի ունեցող փոփոխությունների, զարգացումների համատեքստում: