Սիրիայում կրակի դադարեցման շուրջ Ռուսաստանի և ԱՄՆ-ի համաձայնագրի կրախը փլուզում է ԴԱԻՇ-ի և այլ ահաբեկչական խմբավորումների դեմ պայքարում նրանց համագործակցության հույսերը: Այս մասին գրում է The Wall Street Journal-ը:
Նշվում է, որ սեպտեմբերին կնքված ռուս-ամերիկյան գործարքը պետք է գնահատեր Վաշինգտոնի և Մոսկվայի միջև վստահության սահմանները: Սիրիայում անցած շաբաթը ցույց տվեց, որ նրանք այդպես էլ չկարողացան հաղթահարել իրենց բաժանող անվստահությունն ու թշնամանքը:
Այսպես. ԱՄՆ գլխավորած կոալիցիան սխալմամբ ռմբակոծել է սիրիական բանակի դիրքերը, ինչը հանգեցրել է տասնյակ զոհերի՝ հիշեցնում է պարբերականը: Երկու օր անց ավիահարված էր հասցվել Հալեպում մարդասիրական օգնությամբ շարասյան ուղղությամբ, որի համար ԱՄՆ պաշտոնատար անձինք մեղադրում են Ռուսաստանին: Իսկ անցած հանգստյան օրերին ԱՄՆ պետքարտուղար Ջոն Քերին, Մեծ Բրիտանիայի, Ֆրանսիայի, Իտալիայի, Գերմանիայի ԱԳՆ ղեկավարները, նաև ԵՄ գերագույն ներկայացուցիչ Ֆեդերիկա Մոգերինին խստորեն քննադատել են Ռուսաստանի դիրքորոշումը Սիրիայի հարցում և կասկած են հայտնել խնդիրը դիվանագիտական ճանապարհով լուծելու նրա կարողության հարցում:
Պետդեպի ներկայացուցչի խոսքով՝ Ջոն Քերին և ՌԴ ԱԳՆ ղեկավար Սերգեյ Լավրովը չեն խոսել ուրբաթ օրվանից, և նրանց ոչ մի հանդիպում նախատեսված չէ:
Հոդվածում նշվում է, որ ՌԴ-ի և ԱՄՆ-ի հարաբերությունները բարդ են: Մի կողմից՝ Վաշինգտոնը կարծում է, որ Մոսկվան կառուցողական դեր է խաղացել ԱՄՆ նախագահ Բարաք Օբամայի նախագահության առաջին ժամկետի ընթացքում Իրանի դեմ միջազգային պատժամիջոցների ընդլայնման գործընթացում և Ճնշում է գործադրել Թեհրանի վրա միջուկային համաձայնագիր ստորագրելու նպատակով: Բացի դրանից՝ երկրները համագործակցում են Աֆղանստանի հարցում: Միևնույն ժամանակ ամերիկացի պաշտոնյաները Ռուսաստանին մեղադրում են ԱՄՆ շահերին հակառակվելու և դրա հզորությունը խաթարելու փորձերի մեջ՝ նշվում է հոդվածում:
«Սառը պատերազմի» ոճով հռետորաբանությունը խստացել է վերջին շաբաթներին ԱՄՆ Դեմոկրատական կուսակցության սերվերները կոտրելու ֆոնին, որին, ըստ պնդումների, մասնակից են ռուս ցանցահենները: Կրեմլը հերքում է իր կապը կիբերհարձակումների հետ, բայց ԱՄՆ-ում դրանք որակում են նախագահական ընտրություններին Ռուսաստանի միջամտության նշան: