Ինտերպոլի գլխավոր քարտուղարությունը որոշում է կայացրել Ռուսաստանի Դաշնության Պետական դումայի պատգամավոր Աշոտ Եղիազարյանին, որին մեղադրում են առավել խոշոր չափերի հասնող խարդախության մեջ, մտցնել կազմակերպության կողմից հետախուզվող մարդկանց ցուցակի մեջ։ Այս մասին հաղորդում է RIA-Novosti գործակալությունը։ Ռուսաստանի Դաշնությունում դատարան չներկայացած Աշոտ Եղիազարյանի նկատմամբ 2010 թ. նոյեմբերից հետախուզում էր հայտարարվել և համապատասխան փաստաթղթերը փոխանցվել էին Ինտերպոլ։
Որոշ տեղեկությունների համաձայն՝ Աշոտ Եղիազարյանը գտնվում է ԱՄՆ-ում՝ Լոս Անջելեսում։
Աշոտ Եղիազարյանը Ռուսաստանի քննչական ծառայության կողմից մեղադրվում է 1.5 մլրդ ռուբլու հափշտակության մեջ։ Պետդուման տվել է իր համաձայնությունը՝ Աշոտ Եղիազարյանին անձեռնմխելիությունից զրկելու համար, սակայն նա այդ ժամանակ արդեն երկրում չէր։