Ռուսաստանի Դաշնության նախագահ Դմիտրի Մեդվեդևի երեկվա մեծ ասուլիսի ժամանակ Բեն Լադենի մասին արված հայտարարությունները վրդովել են Ռուսաստանում ԱՄՆ դեսպան Ջոն Բայերլին, որն իր ուղերձը նախագահին հրապարակել է անձնական բլոգում:
Հիշեցնենք, որ մամուլի ասուլիսի ժամանակ Մեդվեդևը հարցրել էր «Առաջին ալիքի» լրագրողին՝ արդյոք ճի՞շտ են այդ օրը «Առաջին ալիքով» նրա կողմից պատրաստված լուրում տեղ գտած հայտարարությունները, համաձայն որոնց Բեն Լադենն իրականում վաղուց սպանվել էր, իսկ վերջերս ամերիկացիներն ուղղակի նրա «դիակն էին նորից սպանել»: Ընդ որում՝ լրագրողին հարցազրույց էր տվել իբր ամերիկյան հատուկ ծառայությունների ոմն աշխատակից: Լրագրողի դրական պատասխանը լսելուց հետո Մեդվեդևն ասել էր. «Դե թող ամերիկացիները հիմա ցնցվեն»:
Ի պատասխան՝ ԱՄՆ դեսպանը իր բլոգում գրել էր, որ այդ նույն ռեպորտաժում հիշատակվել է «անմիտ և վիրավորական այն տեսությունը, համաձայն որի ԱՄՆ-ում սեպտեմբերի 11-ի ահաբեկչությունները կազմակերպվել են ԱՄՆ կառավարության կողմից»: Նրա խոսքերով, այդ ռեպորտաժների հեղինակները և բոլոր նրանք, ովքեր զրուցում են նրանց հետ, իրենց պնդումների ոչ մի ապացույց չեն բերում: «Լսվում է միայն մի բան՝ կոնսպիրոլոգիական տեսակետ»,- շեշտել է դեսպանը:
«Կարծում եմ, որ ԶԼՄ-ներում անհրաժեշտ է լուրջ երկխոսություն, որպեսզի մեր համատեղ ջանքերն էֆեկտիվ լինեն, այլ ոչ թե առաջատար հեռուստաալիքների եթերը լրացվի անպատասխանատու և չապացուցված դատողություններով»,- ասել է Բայերլին:
Վերջում դեսպանը կարծիք է հայտնել, որ «Առաջին ալիքի» լրագրողը նախագահի հարցին պետք է պատասխաներ՝ «Ո՛չ, պարոն նախագահ, դա սուտ է»: