Այսօր Երևանում մեկնարկած՝ «ՀԱՊԿ-ը և Հարավային Կովկասը. տարածաշրջանի խաղաղության և անվտանգության հեռանկարները» թեմայով միջազգային համաժողովում ելույթ ունեցավ ԵԱՀԿ Մինսկի խմբի նախկին համանախագահ Վլադիմիր Կազիմիրովը, ով Ադրբեջանի նախագահ Իլհամ Ալիևի և Ադրբեջանի իշխանությունների ռազմատենչ հռետորաբանությունը համարեց ԵԱՀԿ սկզբունքների հստակ խախտում. «Բոլորին է հայտնի ուժի կամ ուժի սպառնալիքի կիրառման անթույլատրելիության սկզբունքը: Հելսինկյան ամփոփիչ ակտը միանշանակ է խոսում սպառնալիքների անթույլատրելիության մասին»,- ասաց նախկին համանախագահը՝ նկատելով, որ միջնորդներն էլ չպետք է համակերպվեն կողմերի քմահաճույքներին:
Վլադիմիր Կազիմիրովն ի դեպ կարծիք հայտնեց, որ Ադրբեջանի առաջին նախագահ Հեյդար Ալիևը առավել իրատեսորեն էր մոտենում ղարաբաղյան հակամարտությանը և գիտակցում ու կարևորում էր կրակի դադարեցման մասին համաձայնագիրը:
Խոսելով շփման գծում միջադեպերի մասին՝ Կազիմիրովը ասաց, որ Բաքվի մարտավարությունը հետևյալն է՝ հանգիստ չտալ հայկական կողմին: «Ադրբեջանին լարվածություն է պետք, ինչի համար նա իր պատճառներն ունի, Ադրբեջանը ժամանակին հրաժարվել էր զորքերը ետ քաշել շփման գծից, ավելին՝ Իլհամ Ալիևի ժամանակ ավելի մոտեցրին դիրքերը»:
Կազիմիրովը նկատեց նաև, որ Բաքվում գիտակցում են պատերազմի սպառնալիքը և հաճախ արհեստականորեն սրում են լարվածությունը:
Ապա նախկին համանախագահը հայտարարեց, որ Ի. Ալիևի սպառնալիքների նկատմամբ ԵԱՀԿ-ն հանդուրժողականություն է դրսևորում, և հիշեցրեց, որ բոլորն իրենց ուշադրությունը կենտրոնացրել են հակամարտության լուծման միայն երեք սկզբունքների վրա, մինչդեռ կա նաև չորրորդ սկզբունքը՝ «հակամարտությունների վեճերի խաղաղ կարգավորման» անհրաժեշտությունը:
Ռազմական գործողությունների հնարավոր վերսկսման պարագայում ՝ ՀԱՊԿ-ը և Ռուսաստանը ըստ Կազիմիրովի անտարբեր չէր լինի, հակամարտության դադարեցմանն միջոցներ կձեռնարկեն, հակառակ դեպքում, ըստ նախկին համանախագահի՝ կվնասվի Ռուսաստանի դերը խաղաղ կարգավորման գործընթացում:
