Հավաքական անվտանգության պայմանագրի կազմակերպության` ՀԱՊԿ գլխավոր քարտուղար Նիկոլայ Բորդյուժան այսօր Երևանում մեկնարկած «ՀԱՊԿ-ը և Հարավային Կովկասը. տարածաշրջանի խաղաղության և անվտանգության հեռանկարները» թեմայով միջազգային համաժողովում հայտարարեց, որ «ինչպիսին էլ լինեն հարաբերությունները տարածաշրջանի երկրների միջև, որևէ երկրի մեկուսացումն անթույլատրելի է»:
ՀԱՊԿ-ի գլխավոր քարտուղարի խոսքերով, ՀԱՊԿ-ը կողմ է ղարաբաղյան հակամարտության կարգավորմանը բացառապես խաղաղ ճանապարհով և «ոչ ռացիոնալ է համարում գոյություն ունեցող մշտական լարվածության պահպանումը, որը ցանկացած պահի կարող է հանգեցնել ռազմական հակամարտության վերսկսման»:
Ն. Բորդյուժան ընդգծեց, որ ԼՂ հակամարտությունը պետք է լուծվի ողջամիտ փոխզիջումներով: Նա մատնանշեց ներկա իրավիճակի անթույլատրելիությունը, երբ շփման գծում յուրաքանչյուր տարի մոտ 50 մարդ է զոհվում, և մեծ միջոցներ են ծախսվում ռազմական կարիքների համար, ոչ թե երկրների զարգացման նպատակով: «2009 թ. Աքվիլայում մշակված և կողմերի ընդունած բանաձևը` հիմնված Հելսինկյան եզրափակիչ ակտի երեք սկզբունքների վրա, ակնհայտ է, որ ենթադրում է բանական փոխզիջումներ»,- նկատեց Ն. Բորդյուժան:
«ՌԴ ռազմական դոկտրինը հստակ ամրագրում է պարտավորություն՝ ռազմական աջակցություն կազմակերպության անդամ պետություններին, եթե ագրեսիա դրսևորվի ցանկացած անդամ-երկրի նկատմամբ: Դա հուսալի երաշխիք է անդամ պետությունների ինքնիշխանության և տարածքային ամբողջականության պահպանության համար»,- հավելեց Ն. Բորդյուժան:
Այնուհետև ՀԱՊԿ-ի գլխավոր քարտուղարը ուշագրավ կարծիք հայտնեց՝ նշելով, որ Իրանի միջուկային ծրագրի շուրջ անորոշությունը կարող է կոնֆլիկտային իրավիճակներ ստեղծել, ինչը կարող է անդրադառնալ նաև Հարավային Կովկասի վրա: