Այսօր Forbes ամսագրի ռուսական խմբագրությունն անդրադարձել է երեկ Ռուսաստանի նախագահ Դմիտրի Մեդվեդևի առաջին «մեծ ասուլիսին»՝ անվանելով նրան «դատարկություն»: Հոդվածագիրն է Forbes-ի ուկրաինական խմբագրության ղեկավար Վլադիմիր Ֆեդորինը:
Հեղինակը գրում է, որ չէր պատկերացնում, որ այդ ասուլիսն այդքան բովանդակազուրկ կլիներ: «Երեկ լրագրողների առաջ կանգնած էր մի մարդ, որը պատահական է հայտնվել իշխանությունում՝ միջին ունակություններով և բռնության նկատմամբ դժվար հաղթահարելի ձգտմամբ: Մեկնաբանել այդ ծամածռությունները՝ նշանակում է չհարգել ո՛չ քեզ, ո՛չ էլ ընթերցողներին: «Նախագահ Մեդվեդև» նախագիծը փակված է»,- գրում է Ֆեդորինը:
Նշվում է, որ այդ նախագծի մեջ ժամանակին շատ մարդիկ են «ներդրում կատարել»՝ հավատալով այդ գործին, սակայն «Ռուսաստանի նախագահի պաշտոնը զբաղեցնող հասուն մարդուն կրթելու բոլոր փորձերը ոչ մի բանի չհանգեցրին»: Արդիականացման մասին անընդհատ խոսելով հանդերձ երկիրը միայն նահանջում է:
Մասնակցելով Կրեմլի ֆորումներին, աշխատանքային խմբերի աշխատանքների «Ռուսաստանի լավ մարդիկ» օրինականացրեցին այս ռեժիմը՝ նրա համար դառնալով «պահապան՝ Արևմուտքում և լիբերալ մտավորականության շրջանում»: Մինչդեռ նախագահի աշխատակազմի ներկայացուցիչները շարունակում էին «սպանել, խեղդել ընդդիմությանը, գողանալ»:
Նշվել է բազմաթիվ քրեական գործերի մասին, որոնք տեղ են գտել նրա պաշտոնավարման ընթացքում՝ «Մագնիտսկու գործ», «Խիմկիի անտառի» ոչնչացում, կոռուպցիայի բազմաթիվ դեպքեր:
Մեդվեդևի նախագահության շրջանն ավարտվեց: Նրա վարկն ամբողջովին սպառված է: Բոլոր այն մտածող մարդիկ, որոնց նա խոստումներ էր բաժանում, պետք է հիմա ընտրություն անեն: «Որքա՞ն կարելի է խոսել հանցագործների հետ և նրանց հետ, ովքեր հովանավորում են նրանց»,- հարցնում է Ֆեդորինը: «Ամեն անգամ մտնել անպատիվների մեջ՝ սեփական վարկին վնաս չտալով հանդերձ, շատ դժվար է: Լավ, առաջին անգամ չգիտեիք, որ ձեզ Կրեմլից հրավեր ուղարկողները «մատնոց խաղացողներ էին»: Սակայն ինչո՞ւ դուք այնտեղ գնացիք երկրորդ անգամ, երրորդ անգամ: Դո՞ւք էլ մասնաբաժին ունեք»,- հարցնում է Forbes-ի հոդվածագիրը:
«Հիմա անհրաժեշտ է գնալ ոչ թե այնտեղ, ուր ձեզ կանչում են իշխանությունից գժված «փիառշիկները», այլ այնտեղ, որտեղ իրական օրակարգ է ձևավորվում: Պետք չէ օգնել «լիբերալ» Մեդվեդևին: Նա բովանդակային հակասություններ չունի բյուջեն գողացողների և մարդասպանների հետ: Ավելի լավ է` օգնե՛ք Նավալնուն (հայտնի հակակառավարական բլոգեր Ռուսաստանում – 1in.am), այդ դեպքում միայն հնարավորություն կա, որ նրան չեն սպանի կամ բանտ նստեցնի»,- եզրափակում է Ֆեդորինը:
