Էջմիածնի քաղաքապետարանի լրատվութան բաժնի պետ Վարդան Վարդանյանն այսօր լրագրողների հետ զրույցում նշեց, որ ընտրախախտումների վերաբերյալ ահազանգեր չեն ստացել:
Անդրադառնալով նախօրեին Էջմիածնի քաղաքապետի թեկնածուների միջև տեղի ունեցած միջադեպին՝ Վ. Վարդանյանը նշեց, որ նախաքննական մարմնի պաշտոնական վարկածին է ծանոթ: Նրա խոսքով՝ այդ մասին նաև ականատեսներն են պատմում, որ այն մեքենան, որում եղել են Արթուր Թումանյանը և Ստեփան Աբգարյանը, երթևեկությունը խախտել է, և այդ մեքենայից կրակել են:
«Կրակոցներ են եղել այն մեքենայի ուղղությամբ, որի մեջ եղել է քաղաքապետ Արթուր Գրիգորյանը: Լրատվությանը հետևելով՝ ընթերցել եմ Ստեփան Աբգարյանի հորեղբոր հարցազրույցը, ինքն էլ էր հաստատել, որ իրենք խախտել են, մտել են և կրակել են: Հետո երրորդ, չորրորդ հարցազրույցից սկսեցին փոխել իրենց խոսքը, նույնիսկ Հրաչյա Աբգարյանն ասում էր՝ իրենք են սադրել, ավտոմեքենայով մեր փողոցով անցան:
Եթե ենթադրենք ավագանու անդամ են առևանգել, դրանով ո՞վ պետք է զբաղվի, եթե ենթադրենք մեր շտաբից մարդ են գողացել, մենք իրավունք ունե՞նք ինքնադատաստան տեսնելու, օրենսդրությունը մեզ թո՞ւյլ է տալիս նման բան, արյան վրեժի օրենք կա՞ Հայաստանում: Եթե եղել է նման դեպք, պետք է դիմեն ոստիկանություն, իրավապահներին, ոչ թե գնան խախտեն երթևեկությունը, կրակեն, ում ասես կարող էր կպնել… Կարեն Գրիգորյանը զենքով եղել է միայն ապրիլյան պատերազմի օրերին առաջնագծում»,- նշեց Վ. Վարդանյանը:
Նա լրագրողներին հորդորեց «Ո՛չ մեզ հավատացեք, ո՛չ իրենց, դիմեք պաշտոնական նախաքննական մարմնին»:
Մանրամասները՝ տեսանյութում:
