Amnesty International միջազգային իրավապաշտպան կազմակերպությունը կրկին հրաժարվեց Խոդորկովսկուն խղճի կալանավոր ճանաչելուց: Իրավապաշտպանները այսպես են պատասխանել դեռ մարտին իրենց ուղղված «45-ի նամակին», որի տակ ստորագրել էր ռուս մտավորականության 45 ներկայացուցիչ` Amnesty International-ից խնդրելով խղճի կալանավոր ճանաչել ռուսաստանցի գործարար Միխայիլ Խոդորկովսկուն, որին համարում են քաղաքական բանտարկյալ:
Այդ նամակի պատասխանում մասնավորապես նշված է, որ Amnesty International-ը խղճի գերի է համարում բոլոր նրանց, ում առաջադրված մեղադրանքներից և ոչ մեկը հիմնավորված չէ: Հաշվի առնելով խիստ չափորոշիչները` Amnesty International-ը բավական երկար է քննարկում իրեն ուղղված գործերը:
Միաժամանակ նշվել է, որ իրավապաշտպան կազմակերպությունը կարող է իր դիրքորոշումը փոխել երկրորդ դատավճռի բողոքարկումից հետո: Այս մասին հաղորդում է Interfax գործակալությունը: