Սեպտեմբերի 17-ին Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն ընդունել է Ֆրանսիայից ժամանած բժիշկների խմբին` ուղեկցությամբ դոկտ. Ժան Պիեռ Բերբերյանի, տեղեկացնում է Մայր Աթոռ Սուրբ Էջմիածնի տեղեկատվական համակարգը:
Վերջինս Նորին Սրբությանը ներկայացրել է բժիշկների այցի նպատակները և հայցել Ամենայն Հայոց Կաթողիկոսի օրհնությունը:
Ողջունելով ֆրանսիացի բարեկամ ժողովրդի զավակների այցը Մայր Աթոռ Ս. Էջմիածին` Նորին Սրբությունը նրանց ցանկացել է հաճելի և անմոռանալի օրեր հյուրընկալ Հայաստան աշխարհում:
Ամենայն Հայոց Կաթողիկոսը ներկայացրել է Ս. Էջմիածնի առաքելությունը հայ ժողովրդի կյանքում` մասնավորապես ընդգծելով, որ քրիստոնեության ընդունումով ուղեգծվեց հայ ժողովրդի պատմական ընթացքը:
Նորին Սրբությունն ընդգծեց Հայոց Եկեղեցու կարևոր դերակատարությունը ժողովրդի ազգային ինքնության և գոյության պահպանության գործում, ինչպես նաև անդրադարձ է կատարել Եկեղեցու առջև ծառացած ժամանակակից մարտահրավերներին և ներկայիս հովվական ծառայությանը:
Իր խոսքում Վեհափառ Հայրապետը, խոսելով ՀՀ անկախության տարիներին ձևավորված միջպետական հարաբերությունների մասին, գոհունակությամբ շեշտել է ջերմությամբ և բարեկամությամբ հատկանշված սերտ կապերը և գործակցությունը Ֆրանսիայի հետ: Գարեգին Բ Կաթողիկոսն աղոթել է, որ երկու պետությունների ու ժողովուրդների հարաբերությունները միշտ մնան այդքան ջերմ և բարեկամական:
Նորին Սրբությունը, ի դեմս պատկառելի խմբի, շնորհակալություն է հայտնել Ֆրանսիայի ժողովրդին և իշխանություններին` Հայոց Ցեղասպանությունը դատապարտելու և ճանաչելու, ինչպես նաև ղարաբաղյան հակամարտությունը խաղաղ կարգավորման գործում գործադրվող ջանքերի համար:
Ամենայն Հայոց Կաթողիկոսը նաև պատասխանել է բժիշկների հարցերին, որոնք վերաբերում էին Հայոց Ցեղասպանության ու խորհրդային տարիների հետևանքով Հայոց Եկեղեցուն պատճառված ավերների վերականգնմանը, Հռոմի Կաթոլիկ Եկեղեցու և այլ Քրիստոնեական Եկեղեցիների ու կրոնների հետ Հայոց Եկեղեցու հարաբերություններին, աճող սերնդի քրիստոնեական դաստիարակությանը:
Վերջում Վեհափառ Հայրապետն արդյունավոր ծառայություն է մաղթել բժիշկներին` Աստծու զորակցությամբ շարունակ նպաստելու մարդկանց առողջ կյանքին:
