ԱՄՆ պետդեպարտամենտի կայքի փոխանցմամբ, ԱՄՆ պետքարտուղարի Եվրոպայի ու Եվրասիայի հարցերով օգնական Ֆիլիպ Գորդոնն անդրադարձ է կատարել համայն աշխարհում ԱՄՆ առաջնահերթ խնդիրներին:
ԱՄՆ-ը առաջին հերթին պետք է գլոբալ խնդիրների հարցում համատեղ աշխատանքներ տանի իր եվրոպական գործընկերների հետ: Դա մասնավորապես վերաբերում է Աֆղանստանին և Իրանին, Հյուսիսային Աֆրիկային և Մերձավոր Արևելքին:
ԱՄՆ-ը փորձել է առավել կառուցողական հարաբերություններ հաստատել Ռուսաստանի հետ, քանի որ նախագահ Բարաք Օբաման այդ պլանում ծանր ժառանգություն է ստացել իր նախորդից: Ռուս-ամերիկյան հարաբերությունների այդ մակարդակը չի բխել ԱՄՆ-ի շահերից, ինչի համար էլ Օբաման ձգտում է Ռուսաստանի հետ առավել սերտորեն համագործակցել հատկապես այն ոլորտներում, որոնցում համընկնում են ռուս-ամերիկյան շահերը:
ԱՄՆ-ը ողջունում է Եվրոպայի նախաձեռնած «Արևելյան գործընկերություն» նախագիծը, որի նպատակը Ուկրաինայում, Բելառուսում, Մոլդովայում, Հայաստանում, Վրաստանում և Ադրբեջանում ժողովրդավարության, կայունության ու անվտանգության ամրապնդումն է: ԱՄՆ-ը ինքը համանման մոտեցում է ցուցաբերում այդ երկրների նկատմամբ և համակարծիք է իր եվրոպական գործընկերների հետ:
Կովկասում ամերիկյան, եվրոպական և միջազգային այլ ջանքերը որոշակի արդյունք տվել են, սակայն տարածքային վեճերը լուրջ խոչնդոտ են հանդիսանում քաղաքական և տնտեսական բարեփոխումների համար, ինչպես նաև բացասականորեն են ազդում տարածաշրջանի կայունության վրա:
Վրաստանն Աֆղանստանի հարցում ՆԱՏՕ-ի կարևոր գործընկեր է, և ԱՄՆ-ը մեծապես աջակցում է Վրաստանում ժողովրդավարական բարեփոխումներին: ԱՄՆ-ը իր եվրոպական գործընկերների հետ շարունակելու է աջակցել Վրաստանի ինքնիշխանությանն ու տարածքային ամբողջականությանը, որը ճանաչված է միջազգային հանրության կողմից: ԱՄՆ-ը այսուհետ նույնպես աջակցելու է խաղաղ ճանապարհով Աբխազիայի ու Հարավային Օսիայի խնդրի կարգավորմանը:
Տարածաշրջանի մյուս երկրներում ԱՄՆ-ը դարձյալ շեշտը դնելու է ժողովրդավարական բարեփոխումների ու քաղաքական բաց տիրույթի ձևավորման վրա: ԱՄՆ-ը աջակցելու է հայ-թուրքական հարաբերությունների կարգավորմանը, ինչպես նաև ակտիվացնելու է ԵԱՀԿ Մինսկի խմբի մյուս համանախագահ երկրների` Ռուսաստանի և Ֆրանսիայի հետ իր համագործակցությունը, որպեսզի դրանով իսկ Հայաստանին և Ադրբեջանին օգնի հասնելու ղարաբաղյան հիմնախնդրի խաղաղ կարգավորմանը:
ԱՄՆ-ը կարծում է, թե արդեն ժամանակն է, որ կողմերը համաձայնության հասնեն հիմնական սկզբունքների շուրջ և ձեռնամուխ լինեն խաղաղության համաձայնագրի մշակմանը: ԱՄՆ-ն ու Եվրոպան պետք է համատեղ գործեն, որպեսզի կարողանան կանխել Եվրոպայում նոր հակամարտությունների ի հայտ գալը:
