Ինչպես հաղորդում է Facebook-ի պաշտոնական բլոգը, աշխարհի ամենամեծ սոցիալական ցանցում հանվել են ոգելից խմիչքների և մոլախաղերի գովազդի համար գոյություն ունեցող սահմանափակումները: Այս փոփոխությունները վերաբերում են նաև այն ապրանքներին, որոնց պարագայում նույնպես կային սահմանափակումներ՝ վառելիք, կաթնամթերք, դեղամիջոցներ և զենք:
Այժմ, գովազդի բովանդակության համար պատասխանատվությունն ընկած է գովազդատուների և սոցիալական ցանցի օգտատերերի վրա: Facebook-ն ամբողջությամբ ազատվել է այս կամ այն երկրում տվյալ գովազդի ցուցադրման համար նախատեսված պատասխանատվությունից (օրինակ՝ Հնդկաստանում, Բելգիայում, Նորվեգիայում և Շվեդիայում մոլախաղերի գովազդն արգելված է):
Այս քայլով սոցիալական ցանցի ղեկավարությունը փորձել է դյուրացնել Facebook-ի և գովազդատուների միջև կապը, ինչպես նաև ներգրավել հսկայական գումարներ, որոնք առաջ չէին վճարվում սահմանափակումների պատճառով:
