Այսօր Եվրոպական խորհրդարանի նախագահ Եժի Բուզեկը ՀՀ ԱԺ նախագահ Հովիկ Աբրահամյանի հետ համատեղ մամլո ասուլիս էր հրավիրել:
«Առաջին լրատվականը» Եժի Բուզեկին հարց ուղղեց, որը վերաբերում էր օրերս Ազգային ժողովի նախկին նախագահ Տիգրան Թորոսյանի հարցազրույցին, որտեղ նա ըստ էության հաստատել էր այն փաստը, որ բանակը մասնակցել է 2008 թ. մարտի 1-ի իրադարձություններին՝ արդարացնելով ԱԺ-ին, թե՝ «արտակարգ դրությունը չի ենթադրում բանակի օգտագործում»:
«Առաջին լրատվականի» հարցին, թե ԵՄ-ն իր ներքին փաստաթղթերում կարևորում է ժողովրդավարության հիմնարար սկզբունքների պահպանումը, ինչպե՞ս է պարոն Բուզեկը գնահատում այն փաստը, որ առայժմ բացահայտված չեն 2008 թ. մարտի 1-ի տասը սպանությունները, և սա ըստ էության անպատժելիության մթնոլորտ ծնելու հնարավորություն է:
«Ես այդ հարցը քննարկել եմ և՛ խորհրդարանի նախագահի, և՛ երկրի նախագահի հետ և նշել եմ այն հանգամանքը, որ դա մեծ, անգամ ասել եմ՝ բաց վերք է: Ձեր երկրի ամենակարևոր անձինք ինձ հավաստիացրել են, որ հետաքննություն է գնում, որպեսզի այդ խնդիրը լուծվի: Ձեր երկրի նախագահը հայտարարել է այն մասին, որ ձեր իշխանությունները պատրաստ են ձեր երկրում շատ բան փոխել: Եկեք հավատանք այս մեկնարկին: Սա նաև համահունչ է մեր՝ ԵՄ-ի ակնկալիքներին, որովհետև համակարգերը պետք է համատեղելի լինեն մեկը մյուսի հետ, որպեսզի համագործակցություն տեղի ունենա, այսինքն՝ դա ավելի շատ համագործակցություն է ենթադրում: Ես կարծում եմ, որ այս տեսանկյունից դուք գտնվում եք ճիշտ ուղու վրա: Այս հիմնախնդրի լուծում կա՝ ինչպես լուծել 2008 թ. խնդիրը, որպեսզի իշխանությունները վստահելի լինեն: Ես կասեմ հետևյալը՝ ինչ անում եք՝ դա ձեր ընտրությունն է, դուք եք ընտրում, մենք չենք ուզում որևէ բան պարտադրել, դա պետք է լինի ձեր իշխանությունների որոշումը և ձեր ժողովրդի որոշումը, ձեր քաղաքացիների ակնկալիքները: Բայց մենք պատրաստ ենք աջակցել, որովհետև մենք բավական փորձ ունենք: 15-20 տարի առաջ մեր երկրում՝ Եվրոպայի այդ մասում, մենք շատ լուրջ բարեփոխումներ ենք իրականացրել, և այդ բարեփոխումների համար անձամբ ես պատասխանատվություն էի կրում, իսկ դա հեշտ չէր: Բայց ես հասկանում եմ, որ սա կարևոր վճռորոշ որոշում է ձեր իշխանությունների կողմից՝ քայլ առ քայլ, դանդաղ առաջ ընթանալ, որովհետև դա ձեր որոշումն է այդ ուղղությամբ գնալ, և այդ դեպքում, անշուշտ, համագործակցության առումով էլ բավական հեշտ կլինի»,- պատասխանեց Եժի Բուզեկը: